ឃួន លក្ខិណា
ថ្ងៃទី២០ ខែមិថុនា ឆ្នាំ២០១០
ភ្នំពេញ៖ មន្ត្រីក្រសួងសុខាភិបាល និងអាជ្ញាធរជាតិប្រយុទ្ធជំងឺគ្រុនឈាម កាលពីថ្ងៃម្សិលមិញនេះ បានបើក ការផ្សព្វផ្សាយអំពីវិធានការបង្កាជំងឺគ្រុនឈាម ទៅកាន់សិស្សវិទ្យាល័យបាក់ទូក និងប្រជាពលរដ្ឋប្រមាណជាង១ពាន់នាក់នៅរាជធានី ដើម្បីធ្វើការបំផុសស្មារតីបន្ថែមទៀត ក្នុងការទប់ស្កាត់ករណីឆ្លងជំងឺគ្រុនឈាម។
លោកវេជ្ជបណ្ឌិតម៉ម ប៊ុនហេងរដ្ឋមន្រ្តីក្រសួងសុខាភិបាលបានថ្លែងនៅក្នុងទិវាប្រយុទ្ធនិង ជំងឺគ្រុនឈាម ក្នុងវិទ្យាល័យបាក់ទូក កាលពីថ្ងៃម្សិលមិញថា សម្រាប់ឆ្នាំនេះទិវាប្រយុទ្ធនិង ជំងឺគ្រុនឈាមត្រូវបានប្រារព្វធ្វើនៅក្នុងវិទ្យាល័យបាក់ទូក ដែលមានប្រធានបទ ការបង្ការជំងឺគ្រុនឈាម ជាកាតព្វកិច្ចរបស់យើងគ្រប់ៗរូប។ លោកបន្តថា៖«យើងទាំងអស់គ្នា ប្រារព្វទិវាប្រយុទ្ធនិងជំងឺគ្រុនឈាមថ្ងៃនេះ ពិតជាឱកាសដ៏ល្អ ដើម្បីរំលឹកដល់ប្រជាពលរដ្ឋឲ្យបានយល់ដឹងជាថ្មីទៀតពីជំងឺគ្រុនឈាម និងចូលរួមទាំងអស់គ្នាជួយទប់ស្កាត់ជំងឺគ្រុនឈាម កុំឲ្យរីករាលដាលនៅតាមមូលដ្ឋាន ព្រមទាំងធ្វើយ៉ាងណាការពារកុមារដែលជាកូនចៅយើងកុំឲ្យកើតជំងឺគ្រុនឈាម ដើម្បីកាត់បន្ថយជាអតិបរមានូវអត្រាឈឺ និងស្លាប់ដោយជំងឺនេះ»។
បើតាមលោកម៉ម ប៊ុនហេង ឆ្នាំនេះជំងឺគ្រុនឈាមមានចំនួនសរុប១,៩២៤នាក់ ក្នុងនោះស្លាប់១១នាក់ មានការកើនឡើងប្រមាណ៣០ភាគរយច្រើនជាងឆ្នាំមុន។ តែបើទោះបីជាយ៉ាងណាក៏ដោយករណីស្លាប់ ក៏នៅអាចរក្សាបានតូចជាង១ភាគរយ បើធៀបនិងឆ្នាំ២០១០។
ពាក់ពន្ធ័និងបញ្ហានេះ កាលពីសប្តាហ៏មុន លោកង៉ាន់ ចន្ទ័ថា ប្រធានកម្មវិធីជាតិប្រយុទ្ធនិងជំងឺគ្រុនឈាមបានធ្វើការអំពាវនាវដល់ប្រជាពលរដ្ឋទាំងអស់ថា ដើម្បីបង្ការទប់ស្កាត់ជំងឺគ្រុនឈាម គប្បីមាតាបិតា អាណាព្យាបាលកុមារ ត្រូវយកចិត្តទុកដាក់ខ្ពស់ ក្នុងការសម្អាតលំនៅដ្ឋាន ដោយធ្វើយ៉ាងណាកុំឲ្យមានទឹកដក់ កប់ឬដុតចោល សបកដូង កំប៉ុង កង់ឡាន និងវត្ថុដក់ទឹកផ្សេងៗទៀត ដែលអាចជាប្រភពជំរកដង្កូវទឹក ព្រមទាំងលាងសម្អាតពាងឲ្យបានស្អាតល្អកុំឲ្យមានដង្កូវទឹក ឬចិញ្ចឹមត្រីឲ្យស៊ីដង្កូវទឹក។ លោកបញ្ជាក់ថា៖«ខ្ញុំសូមរម្លឹកដល់ប្រជាពលរដ្ឋជាថ្មីម្តងទៀតថា សូមដាក់ថ្នាំសម្លាប់ដង្កូវទឹកក្នុងពាងតាមការនែនាំរបស់ភ្នាក់ងារសុខាភិបាល។ ហើយពេលកូនឈឺដាច់ខាតកុំ ព្យាបាលកូនដោយខ្លួនឯង ត្រូវតែប្រញាប់យកកូនមកមន្ទីរពេទ្យបើសង្ស័យថា មានឆ្លងជំងឺគ្រុនឈាម ពិសេសហាមដាច់ខាតការប្រើប្រាស់ថ្នាំផ្តេសផ្តាស»។
នៅក្នុងប្រទេសកម្ពុជាជំងឺគ្រុនឈាមតែងកើតភាគច្រើនលើកុមារអាយុតិចជាង១៥ឆ្នាំ ដែល ក្នុងនោះកុមារក្នុងវ័យសិក្សាគឺពី៥-៩ឆ្នាំបានទទួលរងគ្រោះច្រើនជាងគេ ប៉ុន្តែអត្រាស្លាប់មានកម្រិត ខ្ពស់ចំពោះកុមារតិចជាង៥ឆ្នាំ។
លោកវេជ្ជបណ្ឌិតច ម៉េងចួ នាយកមជ្ឈមណ្ឌលជាតិប្រយុទ្ធនិងជំងឺគ្រុនចាញ់ប៉ារ៉ាស៊ីតសាស្រ្ត-បាណកសាស្រ្តបានមានប្រសាសន៍ថា ជំងឺគ្រុនឈាមជាបញ្ហាសុខភាពសាធារណៈដែលមានភាពស្មុគស្មាញ និងមានការវិវឌ្ឍន៍ជាបន្តបន្ទាប់ ពិសេសនៅក្នុងបរិបទនៃដំណើរប្រែប្រួលធាតុអាកាសរបស់ប្រទេសក្តៅសើម ដូចជានៅក្នុងបណ្តាប្រទេសអាស៊ានជាដើម។ លោកបញ្ជាក់ថា ៖«យើងតែងធ្វើយុទ្ធនាការដាក់ថ្នាំអាល់បេត នៅតាមតំបន់ចំណុចនៃខេត្ត/ក្រុងនានា និងដាក់ថ្នាំប៊ីធីអាយនៅខេត្តកណ្តាល។ មិនត្រឹមតែប៉ុណ្ណោះ យើងបានធ្វើការផ្សព្វផ្សាយជាមួយនិងភ្នាក់ងារប្រចាំភូមិ ប្រជាពលរដ្ឋ លោកគ្រូ អ្នកគ្រូ សិស្ស និងតាមបណ្តាញទូរទស្សន៏វិទ្យុនិងសុខាភិបាលសាធារណៈជាដើម»។
No comments:
Post a Comment