ដោយៈ ឃួន លក្ខិណា
ថ្ងៃទី៧ ខែមិថុនា ឆ្នាំ២០១១
ភ្នំពេញៈ លោកសេង ស៊ីវត្ថាប្រធានចៅក្រមនៃសាលាឧទ្ធរណ៍រាជធានី កាលពីរសៀលថ្ងៃអង្គារនេះ បានសម្រេចឲ្យស្រ្តីកូនខ្ចីឈ្មោះមាន ស៊ីថា ដែលជាប់ចោទពីបទ ក្លែងបណ្ណ័កម្មសិទ្ធ លើដីលំនៅស្ថានមួយកន្លែងក្នុងខេត្តរតនៈគីរី ត្រូវរស់នៅក្រៅឃុំជាបណ្តោះអាសន្នសិន។
បើតាមលោកមេធាវីការពារក្តីឲ្យស្ត្រីជាប់ចោទ លោកហ៊ល ស៊ីណាបានប្រាប់ភ្នំពេញប៉ុស្តិ៍កាលពីថ្ងៃអង្គារថា នៅក្នុងសាវនាការ កាលពីថ្ងៃអង្គារនេះ លោកបានធ្វើការបំភ្លឺទៅលើអង្គហេតុជាច្រើនដំណាក់កាល ពាក់ពន្ធ័និងការចោទប្រកាន់កូនក្តីលោក ដើម្បីស្នើឲ្យតុលាការធ្វើការពិចារណាលើការរស់នៅកូនក្តីលោកក្នុងស្ថានភាពជាក់ស្តែងនាពេលបច្ចុប្បន្ន។ លោកបន្តថា បន្ទាប់ពីចៅក្រមធ្វើការសាកសួររួចមក តុលាការបានសម្រេចប្រកាសឲ្យកូនក្តីលោករស់នៅក្រៅឃុំជាបណ្តោះអាសន្នសិន។ លោកថ្លែងថា៖«តុលាការបានសម្រេចបែបនេះ ដោយយោងទៅលើហេតុផលទាំង៤ចំនុចធំៗ ទី១ សំអាងថា កូនក្តីលោកមិនមានលទ្ធភាពលួចរត់ ទី២ពុំមានពិរុទ្ធភាពគ្រប់គ្រាន់ ទី៣ គាត់នៅមានកូនខ្ចី ទី៤ រឿងនេះមានចំណងពាក់ពន្ធ័និងរដ្ឋប្បនីនៅតុលាការកំពូល»។ លោកថា៖«នៅថ្ងៃស្អែក ខ្ញុំនិងធ្វើសុំនុំបែបបទយកកូនក្តីខ្ញុំចេញពីមន្ទីរឃុំឃាំងនៅខេត្តរតនគិរីឲ្យបាន»។
ពាក់ពន្ធនិងករណីនេះ កាលពីថ្ងៃទី១០ ខែឧសភា ឆ្នាំ២០១១ លោកលូ ស៊ូសម្បត្តិប្រធានតុលាការខេត្តរតនគិរី បានចេញដីការនាំខ្លួនស្រ្តីជាប់ចោទ ឈ្មោះមាន ស៊ីថា អាយុ៣៥ឆ្នាំ យកទៅឃុំខ្លួននៅពន្ធនាគារខេត្ត ដោយចោទពីបទក្លែងបណ្ណ័កម្មសិទ្ធលើដីលំនៅស្ថានមួយកន្លែង ទំហំ៤៥ ម៉ែត្រគុណនិង៦០ម៉ែត្រ ពីឈ្មោះកែវ ហាវី និងញ៉ែម សុវណ្ណនីដែលត្រូវជាបងប្អូនជីដូនមួយនិងជន ជាប់ចោទ។ ក្រោយពីមានការឃុំខ្លួនស្រ្តីមាន ស៊ីថារួចមក មេធាវីការពារក្តីឲ្យស្រ្តីជាប់ចោទបាន ស្វែងរកក្តីអន្តរាគមន៍ជាបន្តបន្ទាប់ពីតុលាការ ដោយស្នើសុំឲ្យមានការដោះលែងកូនក្តីរបស់គាត់ឲ្យនៅក្រៅឃុំជាបណ្តោះអាសន្នសិន ដោយផ្អែកលើកម្មវត្ថុថា ស្រ្តីជាប់ចោទអាចមិនមានសុខភាពរឹមមាំ ព្រមទាំងថែរក្សាកូនខ្ចីអាយុ៣ខែផងដែរ។
លោកជួង អូនអាយុ៤៥ឆ្នាំរស់នៅភូមិទី៣ សង្កាត់ឡាបានសៀក ក្រុងបានលុង ខេត្តរតនគិរីបានប្រាប់ឲ្យដឹងថា ប្រពន្ធលោកមាន ស៊ីថា អាយុ៣៥ឆ្នាំ បច្ចុប្បន្នកំពុងឈឺទាស់នៅក្នុងពន្ធនាគារខេត្តរតនគីរីអស់រយៈពេលប្រហែល២០ថ្ងៃរួចហើយ រឺឯកូនខ្ចីអាយុ៣ខែវិញរាល់ថ្ងៃតែងស្រែកយំ ដោយសារតែបាត់ម្តាយ។ លោកបន្តថា លោកមានឯកសារគ្រប់គ្រាន់ ដើម្បីបញ្ជាក់ថា ប្រពន្ធលោកគ្មានកំហុស។ លោកថ្លែងថា៖«ខ្ញុំមានការសប្បាយចិត្តគ្មានអ្វីប្រៀប នៅពេលដែលតុលាការធ្វើការសម្រេចឲ្យប្រពន្ធខ្ញុំនៅក្រៅឃុំ»។
លោកលូ ស៊ូសម្បត្តិប្រធានតុលាការខេត្តរតនគិរីបានមានប្រសាសន៍ថា លោកបានស្រាវជ្រាវរកឃើញថា ស្រ្តីជាប់ចោទពិតជាបានក្លែងបន្លំឯកសារកម្មសិទ្ធពិតប្រាកដមែន ព្រោះខាងដើមបណ្តឹងមានភស្តុតាងគ្រប់គ្រាន់ដូចជាប្លង់កម្មសិទ្ធស្របច្បាប់។ លោកថ្លែងថា៖«យើងបានរកឃើញ ថាដើមបណ្តឹងឈ្មោះកែវ ហាវី បានអនុញ្ញាត្តិឲ្យស្រ្តីជាប់ចោទនិងគ្រួសារស្នាក់នៅលំនៅដ្ឋានដែលមានទីតាំងនៅខាងលើមួយរយៈ ក្រោយមកស្រ្តីជាប់ចោទបានលួចទៅធ្វើប្លន់សារជាថ្មីម្តងទៀត។
លោកកែវ ហាវីដើមបណ្តឹងរដ្ឋប្បវេណីក្នុងករណីរឿងក្លែងបណ្ណ័កម្មសិទ្ធកាន់កាប់លំនៅដ្ឋាន បានឲ្យដឹងថា នៅពេលដែលតុលាការសម្រេចបែបនេះ លោកក៏មិនមានអ្វីនិយាយតទៅទៀតដែរ
ព្រោះលោកគឺជាមនុស្សដែលមានការជឿជាក់លើការអនុវត្តនិតិវិធីរបស់តុលាការ។ លោកថ្លែងថា៖«ប្រការដែលតុលាការសម្រេចបែបនេះ វាគ្រាន់តែជាមោនសចេតនា និងជាយុទ្ធសាស្រ្តស៊ើបអង្កេតរឿងក្តីរបស់តុលាការតែប៉ុណ្ណោះ ប៉ុន្តែការផ្តល់ភាពយុត្តិធម៌រឺមិនយុទ្ធត្តិធម៌នោះវាស្ថិតនៅលើការជំនុំជំនះលើកចុងក្រោយឯណោះទេ។ លោកបញ្ជាក់ថា៖« ផ្ទះរបស់ខ្ញុំបានមានកម្មសិទ្ធពីមុនរួចហើយ»។
No comments:
Post a Comment