Thursday, July 14, 2011

បុរសម្នាក់ដេកស្លាប់នៅក្នុងផ្ទះជួលយ៉ាងអណោចអធម៌

ដោយៈ ឃួន​ លក្ខិណា​

ថ្ងៃទី១៤ ខែកក្តដា ឆ្នាំ២០១១
បន្ទាយមានជ័យ៖សមត្ថកិច្ច​ក្រុង​សិរី​សោភណ័​បាន​ធ្វើការ​អះ​អាង​កាល​ពី​ថ្ងៃ​ម្សិល​មិញ​ថា​ និស្សិត​ចប់​ថ្នាក់​បរិញ្ញា​បត្រ័​ផ្នែក​គ្រប់​គ្រង​ម្នាក់​ត្រូវ​បាន​ដេក​ស្លាប់​យ៉ាង​អណោច​អធម៌​ នៅ​ក្នុង​ខ្ទម​ផ្ទះ​ជួល​ដ៏​តូច​មួយ​ ដែល​ស្ថិត​នៅ​ក្នុង​សង្កាត់​អូរ​អំបិល​ ក្រុង​សិរី​សោភណ្ឌ​ ខេត្ត​បន្ទាយ​មាន​ជ័យ​ ដោយ​សារ​ជំងឺ​ខ្យល់​គរ​ ហើយ​មិន​មាន​អ្នក​ណា​ម្នាក់​បាន​ដឹង​ឡើយ​។​
            ប្រភព​ពី​លោក​វីរៈ​សេនីយ៍ត្រី​រ៉ែម​ វីរៈ​អធិការ​ក្រុង​សិរី​សោភណ័​បាន​ថ្លែង​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​ព្រហស្បត្តិ៍​ថា​ សាក​សព​ជន​រង​គ្រោះ​មាន​ឈ្មោះ​ស៊ឹម​ ឌឿន​ ភេទ​ប្រុស​ អាយុ​៣០​ឆ្នាំ​ មាន​ស្រុក​កំណើត​នៅ​ភូមិ​ត្នោត​ ឃុំ​រការ​ ស្រុក​ពាម​រាំង​ ខេត្ត​ព្រៃ​វែង​។​ លោក​បន្ត​ថា​ និស្សិត​ម្នាក់​នេះ​ ត្រូវ​បាន​ដេក​ស្លាប់​នៅ​យប់​ថ្ងៃទី​១៣​ ខែ​កក្តដា​ ក្នុង​ផ្ទះ​ជួល​ដែល​មាន​ម្ចាស់​ឈ្មោះ​ប៉ាវ​ សុជា​ ភេទ​ស្រី​ អាយុ​៥១​ឆ្នាំ​រស់​នៅ​តំបន់​កើត​ហេតុ​ខាង​លើ​។​ លោក​បាន​អះ​អាង​ថា​៖«​កាល​ពី​ថ្ងៃ​ទី​១៤​ ខែ​កក្តដា​នេះ​ សមត្ថកិច្ច​យើង​បាន​ចុះ​ត្រួត​ពិនិត្យ​ដល់​កន្លែង​កើត​ហេតុ​បាន​រក​ឃើញ​ថា​ និស្សិត​ម្នាក់​នេះ​ពិត​ជា​ ស្លាប់​ដោយ​សារ​ជំងឺ​ខ្យល់​គរ​ប្រាកដ​មែន​ ព្រោះ​នៅ​ក្នុង​ផ្ទះ​សាក​សព​បាន​បន្សល់​ទុក​នូវ​វត្ថុ​ចំនួន​ ដូច​ជា​ កុំព្យូទ័រ​មួយ​គ្រឿង​ សៀវ​ភៅ​ឯក​សារ​ជា​ច្រើន​ផ្នែក​ រឺ​ឯ​សាក​សព​វិញ​ មិន​មាន​ស្នាម​របួស​អ្វី​លើ​ខ្លួន​ ទេ​ ក្រៅ​ពី​ហូរ​ឈាម​ចេញ​តាម​ច្រមុះ​និង​ត្រចៀក​។​
            អ្នក​ស្រី​ប៉ាវ​ សុជា​ ម្ចាស់​ផ្ទះ​ជួល​បាន​ឲ្យ​ដឹង​ថា​ និស្សិត​ម្នាក់​នេះ​បាន​មក​ជួល​ផ្ទះ​អ្នកស្រី​អស់​រយៈ​ពេល​ជា​ច្រើន​ខែ​មក​ហើយ​ដើម្បី​បន្ត​ការ​សិក្សា​នៅ​សាលា​ UME​ ខេត្ត​បន្ទាយ​មាន​ជ័យ​។​ អ្នក​ស្រី​ បន្ត​ថា​ និស្សិត​ម្នាក់​នេះ​ឧស្សាហ៍​ព្យាយាម​សិក្សា​ណាស់​ ព្រម​ទាំង​ធ្វើការ​ស៊ី​ឈ្មួល​ហ្វូតូកូ​ពី​នៅ​បណ្តា​គារ​មួយ​ជិត​ផ្ទះ​ទៀត​ផង​។​ អ្នក​ស្រី​និយាយ​ថា​៖«​ មុន​ពេល​កើត​ហេតុ​ខ្ញុំ​ឃើញ​បុរស​ម្នាក់​នេះ​អង្គុយ​រៀន​ដូច​ធម្មតា​ទេ​ រហូត​ដល់​ម៉ោង​៣​ទៅ​៥​ ថ្ងៃទី​១៣​ ខែ​កក្តដា​នេះ​ មាន​មិត្ត​ភក្តិ​របស់​ឈ្មោះ​ឌឿន​ មក​ រក​ ពេល​នោះ​ខ្ញុំ​បាន​ឲ្យ​ប្អូន​ទៅ​ដាស់​ ប៉ុន្តែ​ទ្វារ​ត្រូវ​បាន​ចាក់​សោរ​ជាប់​ បន្ទាប់​មក​ខ្ញុំ​ហៅ​មនុស្ស​ពីរ​បី​នាក់​ ឲ្យ​ធាក់​ទំលាយ​ទ្វារ​ បន្ទាប់​មក​ក៏​ឃើញ​ឈ្មោះ​ឌឿន​ត្រូវ​បាន​ស្លាប់​ទៅ​ហើយ​»​។​
            បច្ចុប្បន្ន​ សាក​សព​ត្រូវ​បាន​ប្រគល់​ជូន​ក្រុម​គ្រួសារ​យក​ទៅ​ធ្វើ​បុណ្យ​តាម​ប្រពៃណី​។​
           

Wednesday, July 13, 2011

អ្នក​ភូមិ​រក​អាជ្ញាធរ​ឲ្យ​ចុះ​រុះ​រើ​ផ្ទះ​សង់​លើ​ផ្លូវ​សាធារណៈ

ដោយៈ ឃួន​ លក្ខិណា​

ថ្ងៃទី១៣ ខែកក្តដា ឆ្នាំ២០១១

កំពង់​ចាម​៖ ប្រជា​ពលរដ្ឋ​ម្នាក់​​បានប្រាប់​ភ្នំពេញប៉ុស្តិ៍​​នៅ​ព្រឹក​ថ្ងៃ​ពុធនេះ​ថា អ្នក​ភូមិ១០​នាក់ ​តំណាង​ឲ្យ​ប្រជា​ពល​រដ្ឋ​ ២០០​គ្រួសារ​ នៅ​ភូមិ​សារាយ  ឃុំ​បុស​ខ្នុរ​ ស្រុក​ចំការលើ ខេត្ត​កំពង់ចាម បា​ន​ប្រមូល ​ផ្តុំ​គ្នា​នៅ​មុខ​សាលា​ឃុំ ដើម្បី​ស្នើ​ឲ្យ​អាជ្ញាធរ​មូល​ដ្ឋាន​នៅ​តំបន់​នេះ ចុះ​រុះ​រើ​ផ្ទះ​មួយខ្នង​ប្រវែង៥​គុណ​២០​ម៉ែត្រ​ ដែល​ជា​របស់​គ្រួសារ​មួយ ​បាន​សាង​សង់​នៅ​លើ​ផ្លូវ​សាធារណៈ​ អស់រយៈ​ពេល​ជា​យូរ​មក​ហើយ​។
លោក​សេង​ វ៉ន​ អាយុ​៤៣​ឆ្នាំ​ ប្រជាពល​រដ្ឋ​ម្នាក់​ក្នុង​ចំណោម​អ្នក​ភូមិ​ទាំង​នោះ​ បាន​ថ្លែង​ឲ្យ​ដឹង​នៅ​ព្រឹក​ថ្ងៃ​ម្សិល​មិញ​ថា​ ពួក​គាត់​បាន​ស្នើ​សុំ​ឲ្យ​អាជ្ញាធរ​ឃុំ​ធ្វើការ​ចុះ​រុះ​រើ​ផ្ទះ​មួយ​ខ្នង​នេះ ដែល​ជា​កម្ម​សិទ្ធិ​របស់​លោក​ម៉ន​ ហឿន​ អាយុ​៥០ឆ្នាំ​ ត្រូវ​បាន​សាង​សង់​បន្ថែម​នៅ​លើ​ផ្លូវ​សាធារណៈ​ ក្នុង​អំឡុង​ពេល​បុណ្យ​ចូល​ឆ្នាំ​ខ្មែរ​រហូត​មក​ដល់​ពេល​នេះ​។​ លោក​បន្ត​ថា​ ពលរដ្ឋ​ទាំង​អស់​បាន​ធ្វើការ​តវ៉ា​ឲ្យ​ឈ្មោះ​ម៉ន​ ហឿន​រុះ​រើ​ផ្ទះ​ចេញ ​ក៏​ព្រោះ​តែ​ ពួក​គេ​ចង់​ធ្វើ​ការ​ជួស​ជុល​ផ្លូវ ​និង​ពង្រីក​បន្ថែម​ឡើង​វិញ​។​ លោក​ថ្លែង​ថា​៖«​យើង​មិន​ចោទ​ជា​បញ្ហា​អ្វី​ទេ​ ប្រសិន​បើ​ម្ចាស់​ផ្ទះ​ម៉ន​ ហឿន​ ពិត​ជា​មាន​ស្ថាន​ភាព​ក្រីក្រ​មែន​នោះ​ ប៉ុន្តែ​ធាតុ​ពិត​គ្រួសារ​មួយ​នេះ​ មិន​មែន​ក្រ​រហូត​ទិញ​ផ្ទះ​មួយ​ខ្នង ​មិន​បាន​នោះ​ទេ​»​។​ លោក​ថា​ វា​អាក្រក់​មើល​ពេក​ ប្រសិន​បើ​អាជ្ញាធរ​នៅ​តែ​បណ្តោយ​ឲ្យ​គ្រួសារ​មួយ​នេះ​ យក​ផ្លូវ​ធ្វើ​ផ្ទះ​រស់​នៅ​ទៀត​នោះ​។​
បើ​តាម​អាជ្ញាធរ​ឃុំ​បាន​ឲ្យ​ដឹង​ថា​ កាល​ពី​ឆ្នាំ​១៩៩០​ ឈ្មោះ​ម៉ន​ ហឿន​បាន​ស្នើ​សុំ​អាជ្ញាធរ​ភូមិ​-​ឃុំ​សាង​សង់​កន្លែង​តូច​តាច​សម្រាប់​បើក​អាជីវកម្ម​លក់​ដូរ​ និង​ហាង​កាត់​សក់​ជាដើម​ ប៉ុន្តែ​ក្រោយ​មក​ឈ្មោះ​ម៉ន​ ហឿន​បាន​ធ្វើ​ហួស​ពី​ការ​ស្នើ​សុំ​ទៅ​ទៀត​ ដោយ​រូប​គេ​បាន​កសាង​ផ្ទះ​ចេញ​ជា​រូប​រាង​បន្តិច​ម្តង​ៗ​ រហូត​មក​ដល់​ឆ្នាំ​២០០០​ ប្រធាន​ភូមិ​បាន​ហៅ​ម៉ន​ ហឿន​ឲ្យ​ចុះ​កិច្ច​សន្យា​រុះ​រើ​ចេញ​ ប៉ុន្តែ​ឈ្មោះ​ម៉ន​ ហឿន​និង​គ្រួសារ​បាន​សុំ​ពន្យា​ពេល​រហូត​ស្នាក់​នៅ​រហូត​ដល់​៦ខែ​ទៀត​ ទើប​យល់​ព្រម​រើ​ចេញ​។​
លោក​គឹម​ ឃួន​មេ​ឃុំ​បុស​ខ្នុរ​បាន​ទទួល​ស្គាល់​ថា​ គ្រួសារ​ឈ្មោះ​ម៉ន​ ហឿន​ពិត​ជា​បាន​ សាង​សង់​លំ​នៅ​ដ្ឋាន​លើ​ផ្លូវ​សាធារណៈ​ប្រាកដ​មែន​ ដូច្នេះ​និតិវិធី​ដែល​លោក​ត្រូវ​ធ្វើការ​ដោះ​ស្រាយ​នៅ​ពេល​នេះ​ គឺ​បញ្ជូន​របាយការណ៍​ទៅ​សាលា​ស្រុក​ ដើម្បី​ឲ្យ​មន្ត្រី​សាលា​ស្រុក​រៀប​ចំ​គណៈ​កម្ម​ការ​ចុះ​ត្រួត​ពិនិត្យ​មើល​ និង​ដោះ​ស្រាយ​ការ​ងារ​នេះ​បន្ត​ទៀត​។​ លោក​គឹម​ ឃួន​និយាយ​ថា​ កាល​ពី​ព្រឹក​មិញ​នេះ​ លោក​បាន​ធ្វើការ​សម្រប​សម្រួល​ប្រជាពល​រដ្ឋ​ទាំង​សង​ខាង​ ដើម្បី​ជៀស​ផុត​មិន​ឲ្យ​មាន​ទំនាស់​។​ លោក​ថា​៖«​មេ​ឃុំ​ពី​មុន​ ពិត​ជា​បើក​ដៃ​ឲ្យ​គ្រួសារ​ម៉ន​ ហឿន​ធ្វើការ​សាង​សង់​លំ​នៅ​ដ្ឋាន​លើផ្លូវ​សាធារណៈ​មែន​ ដោយ​ឡែក​ខ្ញុំ​ទើប​តែ​ចូល​កាន់​តំណែង​ជា​មេ​ឃុំ​ថ្មី​ ដូច្នេះ​រឿង​អ្វីៗ​ផ្សេង​ទៀត​ ខ្ញុំ​មិន​សូវ​ជា​បាន​ដឹង​ទេ​»​។​




Tuesday, July 12, 2011

អ្នកភូមិ៦០នាក់បាននាំគ្នាឡើងមកតវ៉ានៅខាងមុខសាលាខេត្ត ពាក់ពន្ធ័និងដីសម្បាទានដែលក្រុមឈ្មួញរំលោភយក

ដោយៈ ឃួន​ លក្ខិណា​

ថ្ងៃទី១២ ខែកក្តដា ឆ្នាំ២០១១
បន្ទាយមានជ័យ៖ ប្រជាពលរដ្ឋ​ប្រមាណ​៦០​នាក់​ តំណាង​ឲ្យ​ពលរដ្ឋ​៨៣​គ្រួសារ​រស់​នៅ​ស្រុក​ថ្ម​ពួក​ ខេត្ត​បន្ទាយ​មាន​ជ័យ​ កាល​ពី​ព្រឹក​ម្សិល​មិញ​នេះ​ បាន​នាំគ្នា​ធ្វើការ​តវ៉ា​នៅ​ខាង​មុខ​សាសា​ខេត្ត​ ដើម្បី​ទាម​ទារ​ឲ្យ​មាន​ដំណោះ​ស្រាយ​លើ​បញ្ហា​រំលោភ​បំពាន​ដី​សម្បទាន​សេដ្ឋ​កិច្ច​របស់​ប្រជាពល​រដ្ឋ​ ពី​សំ​ណាក់​ក្រុម​ឈ្មួញ​ដែល​បាន​ឃុប​ឃិត​គ្នា​ជាមួយ​និង​អាជ្ញា​ធរ​នៅ​មូល​ដ្ឋាន​។​
ប្រភព​ពី​តំណាង​ពលរដ្ឋ​រង​គ្រោះ​លោក​ប៊ុត​ ច្រឹង​ អាយុ​៤៩ឆ្នាំ​ រស់​នៅ​ភូមិ​ក្តឹប​ថ្ម​ ឃុំ​គោក​រមៀត​ ស្រុក​ថ្ម​ពួក​ ខេត្ត​បន្ទាយ​មាន​ជ័យ​ បាន​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​អង្គារ​ថា​ លោក​និង​ប្រជា​ពលរដ្ឋ​ប្រមាណ​៦០​នាក់​បាន​ឯក​ភាព​គ្នា​ ធ្វើការ​តវ៉ា​នៅ​សា​លា​ខេត្ត​ ដើម្បី​ទាម​ទារ​ឲ្យ​អាជ្ញា​ធរ​ខេត្ត​ធ្វើការ​ដោះ​ស្រាយ​បញ្ហា​ដី​សម្បទាន​ ដែល​បាន​ផ្តល់​ឲ្យ​ប្រជាពលរដ្ឋ​តាំង​ពី​ឆ្នាំ​២០០៩​ ដែល​មាន​ទំហំ​សរុប​ប្រមាណ​១១៤​.៥៨​ហិតា​។​ លោក​បន្ត​ថា​ រហូត​មក​ដល់​ថ្ងៃទី​១៣​ ខែ​ឧសភា​ឆ្នាំ​ ២០១១​នេះ​ បក្ស​ពួក​ឈ្មួញ​ចំនួន​៥នាក់​ ដែល​មាន​ខ្នង​បង្អែក​នៅ​ខាង​ក្រោយ​ជា​ក្រុម​ប្រឹក្សា​ឃុំ​ និង​ ជា​អភិបាល​ស្រុក​ថ្ម​ពួក​ បាន​ជួល​កម្មករ​ ត្រាក់ទ័រ​ និង​គោយន្ត​ចំនួន​១គ្រឿង​ យក​មក​ឈូស​ឆាយ​ដំឡូងមី​ និង​បាញ់​ថ្នាំ​បំផ្លាញ​ដំណាំ​ស្រូវ​ប្រជាពលរដ្ឋ​ដែល​បាន​បង្កើន​ផល​រួច​ហើយ​នោះ​អស់​គ្មាន​សល់​។​ លោក​ថ្លែង​ថា​៖«​នៅ​ក្នុង​ទំហំ​ដី​១១៤​.៥៨​ហិតា​នេះ​ ទើប​តែ​ប៉ះ​ពាល់​៨ហិតា​ប៉ុណ្ណោះ ​ដូច្នេះ​យើង​មាន​ការ​ព្រួយ​បារម្ភ​ថា​ ថ្ងៃ​មុន​អាច​រាល​ដាល​ប៉ះ​លើ​ផ្ទៃដី​សរុប​»​។​ គំនិត​លោក​ពេល​នេះ​ គឺ​ស្នើ​សុំ​ឲ្យ​អភិបាល​ខេត្ត​ព្រម​ទទួល​យក​សំណើរ​ពី​របស់​ប្រជាពលរដ្ឋ​ ទី១​ ត្រូវ​ចេញ​លិខិត​ការ​ពារ​ដី​ប្រជាពលរដ្ឋ​សារ​ជា​ថ្មី ទី២​ ត្រូវ​បញ្ឈប់​សកម្ម​ភាព​ក្រុម​ឈ្មួញ​។​
ទាក់​ទង​បញ្ហា​នេះ​ កាល​ពី​ថ្ងៃ​ទី៦​ ខែ​មិថុនា​ ប្រជាពលរដ្ឋ​បាន​ដាក់​ពាក្យ​ប្តឹង​និង​តវ៉ា​ទៅ​សា​លា​ខេត្ត​ម្តង​រួច​ហើយ​ ប៉ុន្តែ​ត្រូវ​បាន​ក្រុម​អ្នក​មាន​អំណាច​ ព្រម​ប្រគល់​ដី​ឲ្យ​ប្រជាពលរដ្ឋ​ធ្វើ​ស្រែ​វិញ​ លុះ​មក​ដល់​ពេល​នេះ​ ក្រុម​ឈ្មួញ​មិន​បាន​ដក​ខ្លួន​ចេញ​ទេ​ ហើយ​ថែម​ទាំង​ប្រព្រឹត្ត​រំលោភ​លើ​ដី​ទំនាស់​កាន់​តែ​ខ្លាំង​ជាង​មុន​ ដូច្នេះ​ទើប​ប្រជាពលរដ្ឋ​នាំគ្នា​រើ​បំរាស់​ តវ៉ា​សារ​ជា​ថ្មី​ម្តង​ទៀត​។​
លោក​ងួន​ ឌុល​ មេឃុំ​គោក​រមៀត​បាន​ធ្វើការ​បដិសេធន៍​ចំពោះ​ការ​ចោត​ប្រកាន់​លោក​ថា​ ​បាន​ឃុប​ឃិត​ បើក​ដៃ​ឲ្យ​ឈ្មួញ​ធ្វើការ​បំផ្លាញ​ផល​ដំណាំ​របស់​ប្រជាពល​រដ្ឋ​។​ លោក​និយាយ​ថា​៖«​យើង​ បាន​ចុះ​អន្តរាគមន៍​ជួយ​ប្រជាពលរដ្ឋ​រង​គ្រោះ​ទាំង​នោះ​ ដើម្បី​ស្នើ​ឲ្យ​ឈ្មួ​ញ​បញ្ឈប់​សកម្មភាព​របស់​ពួក​គេ​។​ លោក​បញ្ជាក់​ថា​ លោក​មិន​អាច​ធ្វើអ្វី​កើត​ក្រៅ​ពី​ការ​ហាម​ឃាត់​មិន​ឲ្យ​ក្រុម​ឈ្មួញ​ទាំង​នោះ​បន្ត​សកម្មភាព​ទៀត​ទេ​ ដូច្នេះ​បញ្ហា​នេះ​ត្រូវ​ទុក​ឲ្យ​អភិបាល​ខេត្ត​ជា​អ្នក​ដោះ​ស្រាយ​វិញ​។​
លោក​អ៊ុក​ កែវ​រតនៈ​ អ្នក​នាំ​ពាក្យ​សាលា​ខេត្ត​ នៅ​ល្ងាច​ថ្ងៃ​ម្សិល​មិញ​នេះ​ បាន​សរសេរ​របាយ​ការណ៍​ផ្ញើរ​ទៅ​កាន់​លោក​អភិបាល​ខេត្ត​ ដើម្បី​ស្នើ​សុំ​វិធានការណ៍​សម្រាប់​ទប់​ស្កាត់​ជាមួយ​និង​ជន​ខិល​ខូច​ដែល​កំពុង​ប្រព្រឹត្ត​រំលោភ​យក​ដី​សម្បទាន​របស់​ប្រជាពលរដ្ឋ​។​ លោក​បាន​ប្រកាស​ថា​ ដី នេះ​គឺ​ជា​ដី​ស្រប​ច្បាប់​ត្រឹម​ត្រូវ​របស់​ពលរដ្ឋ​ប្រាកដ​មែន​ ដូច្នេះ​លោក​និង​ចេញ​លិខិត​ផ្លូវ​ការ​មួយ​ច្បាប់​បន្ទាន់​ទាក់​ទង​និង​ការ​រំលោភ​បំពាន​នេះ​ ដើម្បី​ធ្វើការ​ប្រកាស​ដល់​ជន​ខិល​ខូច​ទាំង​នោះ​ឲ្យ​ឈប់​បំផ្លាញ​ផល​ដំណាំ​របស់​ប្រជាពលរដ្ឋ​ត​ទៀត​ បើ​មិន​ដូច្នេះ​ទេ​ លោក​និង​អនុវត្ត​តាម​ច្បាប់​។​ លោក​ថ្លែង​ថា​៖​«​យើង​និង​ធ្វើការ​ព្រមាន​២​ទៅ​៣​ដង​ចំពោះ​ជន​ខិល​ខូច​ទាំង​នោះ​ ហើយ​បើ​នៅ​មិន​រាង​ចាល​ទៀត​ យើង​និង​អនុវត្ត​ទៅ​តាម​ច្បាប់​រដ្ឋ​បាល​»​។​

សមត្ថកិច្ចខេត្តកំពង់ចាម បានធ្វើការឃាត់ខ្លួនឪពុកតិរិច្ឆានរំលោភកូនស្រីឯង

ដោយៈ ឃួន​ លកិ្ខណា​

ថ្ងៃទី១២ ខែកក្តដា ឆ្នាំ២០១១
កំពង់ចាម៖ សមត្ថ​កិច្ច​ស្រុក​ត្បូង​ឃ្មុំ​ កាល​ពី​ថ្ងៃ​អាទិត្យ​នេះ​ បាន​សម្រេច​ឃាត់​ខ្លួន​បុរស​ម្នាក់​ អាយុ​៤៦ឆ្នាំ​ ដោយ​សង្ស័យ​ថា​បាន​ជាប់​ពាក់​ពន្ធ័​និង​បទ​ល្មើស​រំលោភ​កូន​ស្រី​បង្កើត​ខ្លួន​អាយុ​១៥ឆ្នាំ​។​
            លោក​ម៉ឹង​ រ៉ៃ​យ៉ា​នាយ​ផ្នែក​ព្រហ្ម​ទណ្ឌ​នគរ​បាល​ស្រុក​ត្បូង​ឃ្មុំ​ បាន​ប្រាប់​ភ្នំ​ពេញ​ប៉ុស្តិ៍​កាល​ពី​ថ្ងៃ​ចន្ទ័​ថា​ យោង​តាម​ពាក្យ​បណ្តឹង​របស់​ម្តាយ​ក្មេង​ស្រី​រង​គ្រោះ​ឈ្មោះ​អ៊ួន​ ស៊ាម​ អាយុ​៤៩ឆ្នាំ​ រស់​នៅ​ភូមិ​ប្រធាតុ​ ឃុំ​ស្រឡប់​ ស្រុក​ត្បូង​ឃ្មុំ​ ខេត្ត​កំពង់​ចាម​ ដែល​បាន​ដាក់​ពាក្យ​ប្តឹង​មក​ការិយាល័យ​ព្រហ្ម​ទណ្ឌ​នគរបាល​ស្រុក​ ​កាល​ពី​ថ្ងៃ​ទី​១០​ ខែ​កក្តដា​នេះ​ បាន​នាំ​ឲ្យ​សមត្ថកិច្ច​ចេញ​ប្រតិបត្តិ​ការ​ ចុះ​ឃាត់​ខ្លួន​បុរស​ឈ្មោះ​អ៊ុន​ ស៊ីថូ​ អាយុ​៤៦​ឆ្នាំ​ មាន​មុខ​របរ​ជា​អ្នក​រត់​ម៉ូតូ​កង់​បី​ និង​ត្រូវ​ជា​ប្តី​របស់​ម្តាយ​ក្មេង​ស្រី​រង​គ្រោះ​ឈ្មោះ​ថ.ស.ស​។​ លោក​បន្ត​ថា​ ជន​សង្ស័យ​បាន​សារភាព​ថា​ ខ្លួន​ពិត​ជា​បាន​ប្រព្រឹត្ត​ដូច​ការ​ចោទ​ប្រកាន់​មែន​ ដូច្នេះ​ឆ្លង​កាត់​តាម​ការ​បង្ហាញ​នេះ​ សមត្ថកិច្ច​បាន​កសាង​សុំនុំ​រឿង​ ដើម្បី​ត្រៀម​បញ្ជូន​ទៅ​តុលាការ​។ ​លោក​ថ្លែង​ថា​៖«​ឥឡូវ​នេះ​យើង​កំពុង​តែ​បញ្ជូន​ជន​ល្មើស​ទៅ​កាន់​ស្នង​ការ​ខេត្ត​ ដើម្បី​ឲ្យ​ខេត្ត​ ត្រៀម​បញ្ជូន​ជន​សង្ស័យ​រូប​នេះ​ ទៅ​កាន់​តុលាការ​នៅ​ក្នុង​ពេល​ឆាប់​ៗ​នេះ​»​។​
            ហេតុ​ការណ៍​ចាប់​រំលោភ​ក្មេង​ស្រី​រង​គ្រោះ​ ថ.ស.ស​ អាយុ​១៥ឆ្នាំ​ដំបូង​បង្អស់​ត្រូវ​បាន​កើត​ឡើង​នៅ​ខែ​វិច្ឆិកា​ ឆ្នាំ​២០១០​ រហូត​មក​ដល់​វេលា​ម៉ោង​២១​និង​១៥​នាទី​យប់​ ថ្ងៃទី​២៩​ ខែ​មិថុនា​ ឆ្នាំ​២០១១​នេះ​ ជន​ល្មើស​ជា​ឳពុក​បាន​ចេញ​ពី​ផ្ទះ​ ដើម្បី​រត់​ម៉ូតូ​កង​បី​ ខណៈ​ពេល​នោះ​ជន​ល្មើស​បាន​ចុច​ទូរ​សព្ទ័​មក​សួរ​កូន​ស្រី​ ថ.ស.ស​ ប៉ុន្តែ​កូន​ស្រី​ មិន​បាន​លើក​ទូរ​សព្ទ័​ទេ​ ព្រោះ​ជាប់​រវល់​និយាយ​គ្នា​ជា​មួយ​និង​ឈ្មោះ​ធឿន​។​ លុះ​ដល់​ពេល​ត្រឡប់​មក​វិញ​ ឆ្លៀត​ឱកាស​ដែល​គ្មាន​មនុស្ស​នៅ​ផ្ទះ​ផង​នោះ​ ជន​ល្មើស​បាន​រក​បង្ក​រឿង​លើ​ក្មេង​ស្រី​រង​គ្រោះ​ ដោយ​ខឹង​មិន​ព្រម​លើក​ទូរ​សព្ទ័​ រួច​ក៏​វៃ​ក្មេង​ស្រី​រង​គ្រោះ​រហូត​ដល់​សន្លប់​។​ លុះ​ដល់​ពេល​ក្មេង​ស្រី​រង​គ្រោះ​ដឹង​ខ្លួន​ភ្លាម​ នាង​ក៏​លួច​យក​រឿង​នេះ​ ខ្សិប​ប្រាប់​ដល់​ម្តាយ​។​
            បើ​តាម​អ្នក​ស្រី​អ៊ួន​ ស៊ាម​ អាយុ​៤៩ឆ្នាំ​ ម្តាយ​ក្មេង​ស្រី​រង​គ្រោះ​អាយុ​១៥ឆ្នាំ​ រស់​នៅ​តំបន់​កើត​ហេតុ​ខាង​លើ​បាន​ប្រាប់​ថា​ កូន​អ្នក​ស្រី​បាន​ប្រាប់​អំពី​ហេតុ​ការណ៍​នេះ​យូរ​ហើយ​ ប៉ុន្តែ​អ្នក​ស្រី​បាន​ត្រឹម​តែ​ប្រាប់​ឲ្យ​កូន​មាន​ការ​ប្រុង​ប្រយត្ន័​ថែម​ទៀត​ប៉ុណ្ណោះ​។​ អ្នក​ស្រី​បន្ត​ថា​ កាល​ពី​វេលា​ម៉ោង​៣ជិត​ភ្លឺ ​ថ្ងៃទី​១០​ ខែ​កក្តដា​  កូន​ប្រុស​ស្រី​និង​អ្នក​ជិត​ខាង​ក្បែរ​ផ្ទះ​អ្នក​ស្រី​បាន​នំាគ្នា​ស្រែក​ឆោ​ឡោ​ បន្ទាប់​ពី​បាន​ដឹង​ហេតុ​ការណ៍​ដែល​ឪពុក​ចិរច្ឆាន​រូប​នេះ​ បាន​ប្រព្រឹត្ត​លើ​កូន​ស្រី​ ក្រោយ​មក​អ្នក​ស្រី​ក៍​សម្រេច​ចិត្ត​ដាក់​ពាក្យ​ប្តឹង​ប្តី​របស់​ខ្លួន​តែ​ម្តង​ទៅ​។ អ្នក​ស្រី​និយាយ​ថា​៖«​ខ្ញុំ​បាន​លឺ​កូន​ស្រី​លួច​ប្រាប់​ខ្ញុំ​យូរ​ហើយ​ អំពី​រឿង​ឪពុក​វា​ចាប់​រំលោភ​ ប៉ុន្តែ​វា​មិន​ហ៊ាន​យក​រឿង​នេះ​ទៅ​ប្រាប់​អ្នក​ណា​ទេ​ ព្រោះ​ឪពុក​វា​បាន​គំរាម​ចង់​សម្លាប់​។​ អ្នក​ស្រី​ថា​៖«​ខ្ញុំ​មិន​សោក​ស្តាយ​ប្តី​របៀប​នេះ​ទេ​ ព្រោះ​បាន​ប្រព្រឹត្ត​អំពើ​ខុស​សីលធម៌​រំលោភ​លើ​កូន​ស្រី​បង្កើត​ខ្លួន​ឯង​ ដូច្នេះ​វា​សម​និង​ត្រូវ​ទទួល​ទោស​»។​
           
           
           
           

ក្មេងប្រុសម្នាក់ត្រូវបានស្លាប់និងម្នាក់ទៀតបានរងរបួសធ្ងន់ដោយសារគ្រោះរន្ទះបាញ់

ដោយៈ ឃួន​ លក្ខិណា​

ថ្ងៃទី១១ ខែកក្តដា ឆ្នាំ២០១១
កំពង់​ចាម​៖​ អាជ្ញាធរ​ស្រុក​ត្បូង​ឃុំ​បាន​ថ្លែង​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​ចន្ទ័​ថា​ យ៉ាង​ហេច​ណាស់​មាន​ក្មេង​ប្រុស​ម្នាក់​ត្រូវ​បាន​ស្លាប់​ និង​ម្នាក់​ទៀត​កំពុង​តែ​សង្គ្រោះ​ក្នុង​មន្ទីរ​ពេទ្យ​ខេត្ត​ បន្ទាប់​ពី​មាន​បាតុភូត​រន្ទះ​បាញ់​កើត​ឡើង​កាល​ពី​វេលា​ម៉ោង​៤​និង​៣០​នាទី​រសៀល​ថ្ងៃទី​១០​ ខែ​កក្តដា​នេះ​។​
            លោក​ម៉ឹង​ រ៉ៃ​យ៉ា​នាយ​ផ្នែក​ព្រហ្ម​ទណ្ឌ​នគរបាល​ស្រុក​ត្បូង​ឃ្មុំ​បាន​ប្រាប់​ឲ្យ​ដឹង​ថា​ បើ​តាម​របាយការ​ណ៍​ ​ក្មេង​ប្រុស​រង​គ្រោះ​ដែល​បាន​ស្លាប់​ ​ដោយ​សារ​រន្ទះ​បាញ់​នេះ​មាន​ឈ្មោះ​ថា​ វ៉ា​ សុខ​ដេត​ អាយុ​១៧ឆ្នាំ​ រស់​នៅ​ភូមិ​ទន្លេ​បិទ​លើ​ ឃុំ​ទន្លេ​បិទ​ ស្រុក​ត្បូង​ឃុំ​ ខេត្ត​កំពង់​ចាម​ ដោយ​ឡែក​ក្មេង​ម្នាក់​ទៀត​ឈ្មោះ​អួន​ មួយ​អ៊ាង​ អាយុ​១៣​ឆ្នាំ​ ត្រូវ​បាន​ដួល​សន្លប់​នៅ​ក្នុង​ហេតុ​ការណ៍​នោះ​ដែរ​ ។​ លោក​បន្ត​ថា​ ក្មេង​ប្រុស​រូប​នេះ​ ត្រូវ​បាន​ស្លាប់​ ខណៈ​ពេល​ដែល​រូប​គេ​កំពុង​លេង​បាត់​ទាត់​ជាមួយ​ក្មេង​ៗ​ជា​ច្រើន​នាក់​ទៀត​ នៅ​ទី​វាល​ខាង​ក្រោយ​ភូមិ​លុះ​ដល់​វេលា​ម៉ោង​ប្រមាណ​៤​និង​៣០​នាទី​រសៀល​ ស្រាប់​តែ​ផ្ទៃ​មេឃ​ចាប់​ផ្តើម​ខ្មៅ​ងងឹត​រក​កល់​ចង់​ភ្លៀង​ ក្រោយ​មក​ស្រាប់​តែ​មាន​បាតុភូមិ​រន្ទះ​បាញ់​លាន់​លឺ​កក្រើក​ភូមិ​ បាន​កើត​ឡើង​បណ្តាល​ឲ្យ​ក្មេង​ប្រុស​ឈ្មោះ​វ៉ា​ សុខ​ដេត​ ត្រូវ​បាន​ស្លាប់​ និង​ ម្នាក់​ទៀត​ឈ្មោះ​អួន​ មួយ​អ៊ាង​ បាន​ដួល​សន្លប់​ហើយ​កំពុង​ធ្វើការ​សង្រ្គោះ​បន្ទាន់​នៅ​មន្ទីរ​ពេទ្យ​ខេត្ត​។​ លោក​បាន​ថ្លែង​ថា​៖«​ចំពោះ​សាក​សព​អ្នក​ស្លាប់​ត្រូវ​បាន​រក​ឃើញ​ថា​ មាន​​របួស​ចំ​១​កំណាត់​ខ្លួន​ចាប់​ពី​ចង្កេះ​ចុះ​ក្រោម​»​។​
            ឥឡូវ​នេះ​សាក​សព​ជន​រង​គ្រោះ​ត្រូវ​បាន​ក្រុម​គ្រួសារ​យក​ទៅ​បូរ​ជា​តាម​ប្រពៃណី​រួច​រាល់​ហើយ​។​

ប្រជាពលរដ្ឋនៅស្រុកបារាយណ៍គ្រោងនិងដាក់ពាក្យប្តឹងមកសម្តេចហ៊ុន សែននៅថ្ងៃអង្គារនេះ


ដោយៈ ឃួន​ លក្ខិណា​

ថ្ងៃទី១០ ខែកក្តដា ឆ្នាំ២០១១
កំពង់​ធំ​៖​ ប្រជា​ពល​រដ្ឋ​១៨៦​គ្រួសារ​រស់​នៅ​ភូមិ​-​ឃុំ​បាក់​ស្នា ​ស្រុក​បារាយណ៍​ ខេត្ត​កំពង់​ធំ​  គ្រោង​និង​ឡើង​មក​កាន់​ទី​ក្រុង​ភ្នំពេញ​ នៅ​ថ្ងៃ​អង្គារ​សប្តាហ៍​ក្រោយ​ ដើម្បី​យក​ពាក្យ​ប្តឹង​ពាក់​ពន្ធ័​និង​ករណី​ជម្លោះ​ដីធ្លី​ជាមួយ​អាជ្ញា​ធរ​ ផ្ញើរ​ទៅ​កាន់​លោក​នាយក​រដ្ឋ​មន្ត្រី​ហ៊ុន​ សែន​។​
តំណាង​ប្រជាពលរដ្ឋ​ម្នាក់​អ្នក​ស្រី​កង​ សូរ​ អាយុ​៦១​ឆ្នាំ​ រស់​នៅ​តំបន់​កើត​ហេតុ​ខាង​លើ​បាន​ថ្លែង​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​អាទិត្យ​ថា​ នៅ​ថ្ងៃ​អង្គារ​នេះ​ និង​មាន​តំណាង​ប្រជាពលរដ្ឋ​ច្រើន​ជាង​១០នាក់​ឡើង​មក​កាន់​ទី​ក្រុង​ភ្នំពេញ​ ដើម្បី​យក​ពាក្យ​ប្តឹង​ដាក់​ទៅ​កាន់​សម្តេច​ហ៊ុន​ សែន​ ក្នុង​គោល​បំណង​ស្នើ​សុំ​ឲ្យ​មាន​កិច្ច​អន្តរាគមន៍​ជា​បន្ទាន់​ លើ​ករណី​អាជ្ញាធរ​ នៅ​តំបន់​ខាង​លើ​បាន​ឃុប​ឃិត​គ្នា​លួច​យក​ដីប្រជាពល​រដ្ឋ​ទៅ​លក់​ឲ្យ​ក្រុម​ហ៊ុន​  ព្រម​ទាំង​ធ្វើការ​ដោះ​ដូរ​ដី​ឲ្យ​ប្រជាពលរដ្ឋ​ ដោយ​មិន​មាន​លក្ខ​ខណ្ឌ​សម​ស្រប​។ អ្នក​ស្រី​បាន​បន្ត​ថា​ មូល​ហេតុ​ដែល​ប្រជាពលរដ្ឋ​ទាំង​អស់​បាន​សម្រេច​ចិត្ត​យក​ពាក្យ​ប្តឹង​ ដាក់​ទៅ​កាន់​នាយក​រដ្ឋ​មន្ត្រី​នៅ​ថ្ងៃ​អង្គារ​នេះ​ ដោយ​សារ​តែ​ប្រជាពលរដ្ឋ​មាន​ការ​អស់​សង្ឈឹម​យ៉ាង​ខ្លាំង ចំពោះ​វិធានការណ៍​ដោះ​ស្រាយ​របស់​អាជ្ញា​ធរ​នៅ​ទី​នោះ​ ដូច្នេះ​ទើប​បង្ខំ​ចិត្ត​ឲ្យ​តំណាង​មួយ​ចំនួន​នេះ​ ធ្វើ​ដំណើរ​មក​ទី​ក្រុង​ភ្នំពេញ​។​ អ្នក​ស្រី​ថ្លែង​ថា​៖«​យើង​ពិត​ជា​មាន​បំណង​បែប​នេះ​ប្រាកដ​មែន​ ​ប៉ុន្តែ​បើសិន​ជា​មាន​ការ​ប្រែប្រួល​ស្ថាន​ភាព​យ៉ាង​ម្តេច​ទៀត​នោះ​ នៅ​ថ្ងៃ​ចន្ទ័​នេះ​ ​យើង​និង​ដឹង​ទាំង​អស់​គ្នា​»​។​
កាល​ពី​ឆ្នាំ​១៩៩៧​ ប្រជាពល​រដ្ឋ​ចំនួន​១៨៦​គ្រួសារ​បាន​មក​រស់​នៅ​និង​ធ្វើ​ចំការ​លើ​ដី​ដើម​ភូមិ​មាន​ទំហំ​ប្រហែល​ជា​៣០​ហិតា​ ​ក្រោយ​មក​មេឃុំ​បាន​កាត់​ដី​ចំការ​ប្រជា​ពល​រដ្ឋ​មួយ​ផ្នែក​ធំ​លក់​ទៅ​ឲ្យ​ក្រុម​ហ៊ុន​សុភង្គម​ ដើម្បី​ធ្វើ​អាជីវកម្ម​ដាំ​ដើម​អាកាស​ស្សា​។​ រហូត​មក​ដល់​ឆ្នាំ​២០០៨​ អាជ្ញាធរ​ក្នុង​តំបន់​ខាង​លើ​ បាន​ឃុប​ឃិត​គ្នា​ជាមួយ​និង​ម្ចាស់​ក្រុម​ហ៊ុន​មួយ​ទៀតរបស់វៀត​ណាម បាន​យក​អាប៊ុល​​មក​ឈូស​​ឆាយ​ផ្ទះ ​និង​ដី​ចំការ​របស់​ប្រជាពលរដ្ឋ​ ដោយ​បង្ខំ​ឲ្យ​ពួក​គេ​រើ​ចេញ​ពី​លំ​នៅ​ដ្ឋាន​នោះ​ជា​បន្ទាន់​។​
តំណាង​ប្រជាពលរដ្ឋ​រង​គ្រោះ​ម្នាក់​ទៀត​ អ្នក​ស្រី​យិន​ ស្រី​ខួច​ អាយុ​៣៦ឆ្នាំ​ រស់​នៅ​តំបន់​កើត​ហេតុ​ ខាង​លើ​ កំពុង​មាន​ការ​ភិត​ភ័យ​និង​ព្រួយ​បារម្ភ​យ៉ាង​ខ្លាំង​ ខណៈ​ដែល​គាត់​ជា​មនុស្ស​ម្នាក់​ត្រូវ​ចូល​រួម​យក​ពាក្យ​ប្តឹង​នេះ​ មក​ទី​ក្រុង​ភ្នំពេញ​ ដើម្បី​ដាក់​ជូន​សម្តេច​ហ៊ុន​ សែន​។​ អ្នក​ស្រី​បាន​រៀប​រាប់​ថា​  អ្នក​ស្រី​និង​ប្រជាពល​រដ្ឋ​មួយ​ចំនួន​ទៀត​មាន​ការ​ព្រួយ​បារម្ភ​ភ័យ​ខ្លាច​អាជ្ញាធរ​ចាំ​ស្ទាក់​តាម​ផ្លូវ​ដើម្បី​ចាប់​ ដែល​នេះ​ជា​ហេតុ​មួយ​អាច​ធ្វើ​ឲ្យ​ប្រជាពលរដ្ឋ​មិន​អាច​ធ្វើ​ដំណើរ​មក​កាន់​ទី​ក្រុង​បាន​។​ អ្នក​ស្រី​និយាយ​ថា​៖«​ដោយ​សារ​មាន​ការ​ព្រួយ​បារម្ភ​ ទើប​ល្ងាច​នេះ​ ប្រជាពលរដ្ឋ​ណាត់​ជួប​ជុំ​គ្នា​ ដើម្បី​ពិភាក្សា​ស្វែង​រក​មធ្យោបាយ​ត​ទៀត​»។
អ្នក​ស្រី​ម៉ម​ ស៊ីថា​ ប្រធាន​គណៈ​កម្មាធិការ​កម្ពុជា​ឯក​រាជ្យ​ស្ថាបន័​ពុក​រលួយ​នៅ​តែ​រង់​ចាំ​ឃ្លាំ​មើល​អំពី​ សកម្មភាព​ប្រជាពលរដ្ឋ​ ដើម្បី​ឲ្យ​ដឹង​ប្រាកដ​ថា​ តើ​បណ្តឹង​ប្រជាពល​រដ្ឋ​ត្រូវ​ការ​អ្វី​ឲ្យ​ពិត​ប្រាកដ​នោះ​។ អ្នក​ស្រី​អះ​អាង​ថា​៖«​ កន្លង​មក​នេះ​ខាង​អាជ្ញាធរ​ គេ​បាន​ចេញ​សេចក្តី​សម្រេច​ម្តង​រួច​មក​ ក្នុង​ការ​ដោះ​ស្រាយ​ផ្តល់​ដី​ឲ្យ​ប្រជាពលរដ្ឋ​ចំនួន​១១៤​គ្រួសារ​ ហើយ​ក្នុង​១១៤​នេះ​ មាន​អ្នក​ខ្លះ​ ព្រម​ទទួល​យក​ អ្នក​ខ្លះ​មិន​ព្រម​យក​ជា​ដាច់​ខាត​ ដោយ​សារ​ការ​ដោះ​ដូរ​នោះ​ វា​មិន​សម​ស្រប​តាម​លក្ខ​ខណ្ឌ​ដែល​ពួក​គេ​ចង់​បាន​ ដូច្នេះ​យើង​ចង់​ដឹង​ថា​ តើ​ពាក្យ​បណ្តឹង​នេះ​ មាន​ស្នើ​ទាម​ទារ​កាន់​កាប់​ដី​ធ្លី​ដែរ​ទេ​ ហើយ​តើ​អ្នក​ដែល​មាន​ឈ្មោះ​កាន់​កាប់​ដី​ ដែល​អាជ្ញាធរ​ចារ​ឲ្យ​នោះ​ មក​ដល់​ពេល​បច្ចុប្បន្ន​បាន​ទទួល​សិទ្ធ​កាន់​កាប់​ហើយ​នៅ​»​។​
លោក​លី​ គឹម​ទាវ​ប្រធាន​គណៈ​កម្មាធិការ​ដោះ​ស្រាយ​វិវាទ​ដី​ធ្លី​បាន​មាន​ប្រសាសន៍​ថា​ រាល់​ការ​ប្តឹង​របស់​ប្រជាពលរដ្ឋ​ វា​មិន​មែន​សុទ្ធ​តែ​ត្រូវ​ទាំង​អស់​នោះ​ទេ​ ដូច្នេះ​ប្រជាពលរដ្ឋ​មាន​សិទ្ធ​ដាក់​ពាក្យ​ប្តឹង​ទៅ​ទី​ណា​ក៏​បាន​ ហើយ​អាជ្ញាធរ​ក៏​មិន​មាន​សិទ្ធ​ហាម​ឃាត់​ពួក​គាត់​ដែរ​។​ លោក​និយាយ​ថា​៖«​នៅ​ក្នុង​ពាក្យ​ប្តឹង​នេះ​ ប្រសិន​បើ​ ការ​ស្រាវ​ជ្រាវ​រក​ឃើញ​ថា​ អាជ្ញាធរ​បាន​ប្រព្រឹត្ត​ខុស​មែន​នោះ​ យើង​សុខ​ចិត្ត​ជាប់​ទោស​ តែ​បើ​ប្រជា ពលរដ្ឋ​ជា​អ្នក​ខុស​វិញ​ ក៏​គួរ​តែ​ទទួល​ទោស​នោះ​ដូច​គ្នា​ដែរ​»​។​






Thursday, July 7, 2011

ប្រទេស២ក្បែរព្រំដែនកម្ពុជាកំពុងតែពង្រឹងកិច្ចសហកាគ្នាដើម្បីទប់ស្កាត់ជំងឺឆ្លង


ដោយៈ ឃួន​ លក្ខិណា​        

ថ្ងៃទី៧ ខែកក្តដា ឆ្នាំ២០១១
ភ្នំពេញ៖ កម្ពុជា​បាន​ពង្រឹង​កិច្ច​សហការ​របស់​ខ្លួន​ជាមួយ​និង​ប្រទេស​វៀត​ណាម​-​ឡាវ​ ដើម្បី​បន្ត​ការ​ប្រយុទ្ធ​ទប់​ស្កាត់​ជំងឺ​ឆ្លង​ក្នុង​មហា​អនុ​តំបន់​ទន្លេ​មេគង្គ​។​
លោក​វេជ្ជ​បណ្ឌិត​អ៊ុយ​ វែង​គី​ប្រធាន​រដ្ឋ​បាល​កម្មវិធី​ទ្រទ្រង់​សុខាភិបាល​ជំហ៊ាន​ទី​២​នៃ​ក្រសួង​សុខាភិបាល​បាន​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​ម្សិល​មិញ​ថា​ ដោយ​មាន​កិច្ច​សហការ​គ្នា​រវាង​ប្រទេស​វៀត​ណាម​ កម្ពុជា​ ឡាវ​ ក្នុង​ការ​ទប់​ស្កាត់​ជំងឺ​ឆ្លង​ក្នុង​ប្រទេស​ និង​ជំងឺ​ឆ្លង​តាម​ព្រំដែន​ ធនាគារ​អភិវឌ្ឍ​ន៍​អាស៊ី​ ADB​ បាន​ផ្តល់​ថវិការ​ប្រមាណ​១០​លាន​ដុល្លា​ សម្រាប់​អនុវត្ត​គម្រោង​ប្រយុទ្ធ​និង​ទប់​ស្កាត់​ជំងឺ​ឆ្លង​ក្នុង​មហា​អនុ​តំបន់​ទន្លេ​មេគង្គ​ទី២​ ដែល​បាន​ចាប់​ផ្តើម​អនុវត្ត​ពី​ឆ្នាំ​២០១១​-​២០១៥​។​ លោក​បន្ត​ថា​ ADB​ បាន​ផ្តល់​គម្រោង​ជួយ​នៅ​ក្នុង​តំបន់​ដែល​ជាប់​ព្រំដែន​កម្ពុជា​ វៀត​ណាម​ និង​ឡាវ​ ដោយ​ផ្តោត​យ៉ាង​សំខាន់​លើ​ជំងឺ​ឆ្លង​។​ លោក​ថ្លែង​ថា​៖«​គម្រោង​នេះ ​ត្រូវ​ទាម​ទារ​ឲ្យ​មាន​កិច្ច​សហការ​យ៉ាង​ខ្លាំង​ខ្លា​ពី​អាជ្ញាធរ​ព្រំដែន​ប្រទេស​វៀត​ណាម​ និង​ឡាវ​ ដើម្បី​រៀបចំ​ប្រពន្ធ័​ទប់​ស្កាត់​ឆ្លើយ​តប​ឲ្យ​បាន​ទាន់​ពេល​វេលា​ លើ​ករណី​ឆ្លង​ជំងឺ​ដែល​អាច​កើត​មាន​នៅ​តាម​ព្រំដែន»​។ លោក​ថា៖«​ទឹក​ប្រាក់​ដែល​យើង​បាន​ទទួល​ពី​ម្ចាស់​ជំនួយ​ គឺត្រូវ​រៀប​ចំ​ជា​ប្រពន្ធ័​ឆ្លើយ​តប​ជា​បន្ទាន់​នៅ​ក្នុង​ខេត្ត​ចំនួន​១០​ ដែល​ជាប់​ប្រទេស​វៀត​ណាម​ និង​ឡាវ​ ដូច្នេះ​តាម​ខេត្ត​និង​តាម​ស្រុក​ប្រតិបត្តិ​និមួយៗ​ ត្រូវ​តែ​រៀបចំ​ឲ្យ​មាន​មន្រ្តី​ឆ្លើយ​តប​ ដើម្បី​ធ្វើ​សេច​ក្តី​រាយការណ៍​ និង​សកម្មភាព​ប្រតិបត្តិ​ការ​សង្គ្រោះ​ភ្លាម​ៗ នៅ​ពេល​មាន​ជំងឺ​ឆ្លង​ផ្ទុះ​កើត​ឡើង​។​
            លោក​អេង​ ហួត​ រដ្ឋ​លេខាធិការ​ក្រសួង​សុខាភិបាល​បាន​ធ្វើការ​ណែនាំ​ដល់​មន្ត្រី​នៅ​ក្រោម​ឱវាទ​ថា​ ម្ចាស់​ជំនួយ​បាន​មើល​ឃើញ​អំពី​សារៈ​សំខាន់​ ក្នុង​ការ​រីក​រាល​ដាល​នៃ​ជំងឺ​ឆ្លង​ ដូច្នេះ​មន្ត្រី​ ដែល​ស្ថិត​នៅ​ក្នុង​ក្រសួង​ពាក់​ពន្ធ័​ទាំង​អស់​ ត្រូវ​តែ​អនុវត្ត​ធ្វើ​ការ​ងារ​នេះ​ យ៉ាង​ម្តេច​ឲ្យ​មាន​តម្លាភាព​។​ លោក​បន្ត​ថា​ ការ​ងារ​នេះ​វា​មិន​មែន​ពាក់​ពន្ធ័​តែ​ប្រទេស​កម្ពុជា​តែ​ឯង​ទេ​ ប៉ុន្តែ​វា​បាន​ជាប់​ពាក់​ពន្ធ័​និង​ ប្រទេស​វៀត​ណាម​ និង​ឡាវ​ផង​ដែរ​ ដូច្នេះ​លោក​ចង់​ឲ្យ​មន្រ្តី​ទាំង​អស់​បាន​យល់​ដឹង​អំពី​ផែន​ការ​ និង​សកម្មភាព​ដែល​ត្រូវ​ធ្វើ​ឲ្យ​បាន​ច្បាស់​លាស់​ ដោយ​សារ​តែ​នេះ​ គឺ​ជា​ផល​ប្រយោជន៍​រួម​។​ លោក​ថ្លែង​ថា​៖«​ យើង​ត្រូវ​ធ្វើការ​ទប់​ស្កាត់​ជំងឺ​ឆ្លង​ឲ្យ​បាន​ទាន់​ពេល​វេលា​ បើ​មិន​ដូច្នេះ​ទេ​ វា​និង​អាច​នាំ​ឲ្យ​មាន​អន្តរាយ​រហូត​បណ្តាល​ឲ្យ​មនុស្ស​ស្លាប់​ ព្រោះ​ជំងឺ​ឆ្លង​គឺ​ជា​ជំងឺ​ដែល​រីក​រាល​ដាល​ ដូច្នេះ​យើង​ត្រូវ​តែ​ធ្វើការ​បង្ការ​ជា​មុន​។​
            លោក​សុខ​ ទូច​ប្រធាន​នាយកដ្ឋាន​ប្រយុទ្ធ​និង​ជំងឺ​ឆ្លង​នៃ​ក្រសួង​សុខាភិបាល​បាន​មាន​ប្រសា សន៍​ថា​ ADB​ មាន​គម្រោង​សម្រាប់​ប្រទេស​ទាំង​បី​ ដោយ​សារ​តែ​សមត្ថភាព​ឆ្លើយ​តប​នៅ​មាន​កម្រិត​ ដែល​នេះ​ វា​បាន​ផ្សារ​ភ្ជាប់​ទៅ​និង​ការ​ព្រួយ​បារម្ភ​នៅ​ក្នុង​តំបន់​ សម្រាប់​ការ​ប្រយុទ្ធ​និង​ទប់​ស្កាត់​ការ​រីល​រាល​ដាល​ជំងឺ​គ្រុន​ផ្តា​សាយ​បក្សី​។​ លោក​បន្ត​ថា​ ជំងឺ​ឆ្លង​ដែល​ជា​ដើម​ហេតុ​គួរ​ឲ្យ​ព្រួយ​បារម្ភ​ជាង​គេ​នោះ​ គឺ​ជំងឺ​គ្រុន​ឈាម​ ព្រោះ​ថា​ ក្នុង​១ឆ្នាំ​ជំងឺ​នេះ​ត្រូវ​ផ្ទុះ​ឡើង​ម្តង​ បន្ទាប់​មក​ជំងឺ​គ្រុន​ផ្តាសាយ​បក្សី​ ជំងឺ​រាក​រូស​ ពុល​ចំណី​អាហារ​ និង​ជំងឺ​ឆ្លង​ជា​ច្រើន​ប្រភេទ​ទៀត​។​ លោក​ថ្លែង​ថា​៖«​យើង​ត្រូវ​តែ​ពង្រឹង​សមត្ថ​ភាព​មន្ត្រី​របស់​យើង​នៅ​តាម​ច្រក​ព្រំដែន​ ដើម្បី​កិច្ច​សហការ​អន្តរជាតិ​ទប់​ស្កាត់​ជំងឺ​ឆ្លង​ទាំង​នេះ»​។​



អាជ្ញាធរស្រុកបារាណ៍បានព្រមានចាប់តំណាងប្រជាពលរដ្ឋ

ដោយៈ ឃួន​ លក្ខិណា​

ថ្ងៃទី៦ ខែកក្តដា ឆ្នាំ២០១១

កំពង់ធំ៖ អាជ្ញា​ធរ​ស្រុក​បារាណ៍​ កាល​ពី​ថ្ងៃ​អង្គារ​ បាន​ធ្វើការ​ព្រមាន​ចាប់​តំណាង​ប្រជាពលរដ្ឋ​ទៅ​ដាក់​មន្ទីរ ​ឃុំ​ឃំាង​ ប្រសិន​បើ​ប្រជាពល​រដ្ឋ​នៅ​តែ​មិន​បញ្ឈប់​សកម្មភាព​តវ៉ា​របស់​ខ្លួន​ ដើម្បី​ទាម​ទារ​សិទ្ធ​កាន់​កាប់​ដី​ធ្លី​ឲ្យ​បាន​គ្រប់​ចំនួន​១៨៦​គ្រួសារ​នោះ​។​
     លោក​លី​ គឹម​ទាវ​ប្រធាន​គណៈ​កម្មាធិការ​ដោះ​ស្រាយ​វិវាទ​ដី​ធ្លី​ ខេត្ត​កំពង់​ធំ​បាន​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​អង្គារ​ថា​ អស់​រយៈ​ពេល​៤​ឆ្នាំ​ហើយ​ ដែល​លោក​បាន​ធ្វើការ​ដោះ​ស្រាយ​បញ្ហា​វិវាទ​ដីធ្លី​ប្រជាពលរដ្ឋ​រស់​នៅ​ភូមិ​-​ឃុំ​បាក់​ស្នា​ ស្រុក​បារាយណ៍​ ខេត្ត​កំពង់​ធំ​នេះ​។​ លោក​បន្ត​ថា​ ពី​ដំបូង​ឡើយ​ប្រជាពល​រដ្ឋ​បាន​មក​ដាក់​ពាក្យ​ប្តឹង​មក​លោក​ មាន​ចំនួន​ត្រឹម​តែ​១១៤​គ្រួសារ​ប៉ុណ្ណោះ​ ហើយ​អ្នក​ទាំង​នោះ​បាន​យល់​ព្រម​ទទួល​យក​សំណើរ​របស់​លោក​ ក្នុង​ការ​ដោះ​ដូរ​ដី​ពី​ដី​ដើម​ភូមិ​ទៅ​រស់​នៅ​លើ​ដី​ចុង​ភូមិ​វិញ​ ប៉ុន្តែ​ក្នុង​នោះ​មាន​ជន​ខិល​ខូច​មួយ​ចំនួន​បាន​ដើរ​បង្ករ​រឿង​ ដោយ​ចេះ​តែ​ថែម​ឈ្មោះ​ជន​មក​ពី​ក្រៅ​រហូត​ដល់​ឡើង​ដល់​១៨៦​គ្រួសារ​ ដូច្នេះ​លោក​បាន​ទទួល​ស្គាល់​ប្រជាពលរដ្ឋ​ដែល​មាន​សិទ្ធ​កាន់​កាប់​ដី​តែ​ចំនួន​១១៤​គ្រួសារ​ប៉ុណ្ណោះ​។​ លោក​ថ្លែង​ថា​៖«​យើង​កំពុង​ធ្វើ​ការ​ស៊ើប​អង្កេត​តាម​រក​ជន​បះ​បោរ​ដែល​ជា​តំណាង​ប្រជាពលរដ្ឋ​នោះ​ ដើម្បី​យក​ដាក់​មន្ទីរ​ឃុំ​ឃាំង​ ជា​ការ​ព្រមាន​»​។​
     កាល​ពី​ឆ្នាំ​១៩៩៧​ ប្រជាពល​រដ្ឋ​ចំនួន​១៨៦​គ្រួសារ​បាន​មក​រស់​នៅ​និង​ធ្វើ​ចំការ​លើ​ដី​នេះ ដែល​ជា​ដី​ដើម​ភូមិ​មាន​ទំហំ​ប្រហែល​ជា​៣០​ហិតា​ ក្រោយ​មក​មេឃុំ​បាន​កាត់​ដី​ចំការ​ប្រជា​ពល​រដ្ឋ​មួយ​ផ្នែក​ធំ​លក់​ទៅ​ឲ្យ​ក្រុម​ហ៊ុន​សុភង្គម​ ដើម្បី​ធ្វើ​អាជីវកម្ម​ដាំ​ដើម​អាកាស​ស្សា​។​ រហូត​មក​ដល់​ឆ្នាំ​២០០៨​ អាជ្ញាធរ​ក្នុង​តំបន់​ខាង​លើ​ បាន​ឃុប​ឃិត​គ្នា​ជាមួយ​និង​ម្ចាស់​ក្រុម​ហ៊ុន​មួយ​ទៀតរបស់វៀត​ណាម បាន​យក​អាប៊ុល​ចំនួន​២​គ្រឿង​មក​ឈូស​ឆាយ​ផ្ទះ ​និង​ដី​ចំការ​របស់​ប្រជាពលរដ្ឋ​ ដោយ​បង្ខំ​ឲ្យ​ពួក​គេ​រើ​ចេញ​ពី​លំ​នៅ​ដ្ឋាន​នោះ​ជា​បន្ទាន់
អ្នក​ស្រី​កង​ សូរ​ អាយុ​៦១​ឆ្នាំ​ តំណាង​ប្រជាពល​រដ្ឋ​ភូមិ​-​ឃុំ​បាក់​ស្នា ​ស្រុក​បារាណ៍​ ខេត្ត​កំពង់​ធំ​ បាន​មាន​ប្រសាសន៍​ថា​ ឥឡូវ​នេះ​អ្នក​ស្រី​និង​ប្រជាពល​រដ្ឋ​ដែល​កំពុង​រង់​គ្រោះ​ទាំង​អស់​មាន​ការ​ភិត​ភ័យ​យ៉ាង​ខ្លាំង​ នៅ​ពេល​ដែល​អាជ្ញាធរ​បាន​ប្រកាស​តាម​ចាប់​ខ្លួន​អ្នក​ស្រី​និង​ពល​រដ្ឋ​មួយ​ចំនួន​ទៀត​។​ អ្នក​ស្រី​និយាយ​ថា​៖«​ពួក​យើង​មិន​បាន​ធ្វើ​ដូច​ការ​លើក​ឡើង​របស់​អាជ្ញាធរ​រូប​នេះ​ទេ​ ផ្ទុយ​ទៅ​វិញ​ រូប​គេ​ទេ​ ដែល​មាន​ល្បិច​កល់​លួច​យក​ដី​របស់​ពួក​យើង​ទៅ​លក់​ឲ្យ​ក្រុម​ហ៊ុន​១​ដង​ជា​ពីរ​ដង​ មិន​ត្រឹម​តែ​ប៉ុណ្ណោះ​គេ​បាន​លួច​ក្លែង​បន្លំ​ចំនួន​អ្នក​ដែល​ត្រូវ​ដោះ​ដូរ​ដី​ថែម​ទៀត​ផង​»។​ អ្នក​ស្រី​ថា​៖«​ឥឡូវ​នេះ​ ប្រជា​ពល​រដ្ឋ​បាន​នាំគ្នា​ផ្អាក​សកម្ម​ភាព​តវ៉ា​មួយ​រយៈ​សិន​ ដើម្បី​ជៀស​វាង​មិន​ឲ្យ​អ្នក​ណា​ម្នាក់​ត្រូវ​ជាប់​ឃុំ​ឃាំង​ ប៉ុន្តែ​ទោះ​ជា​យ៉ាង​នេះ​ក៏​ដោយ​ យើង​នៅ​តែ​បន្ត​ការ​ប្រមូល​មេដៃ​ជា​សំងាត់​ដែរ​ ដើម្បី​រៀប​ចំ​បណ្តឹង​ដាក់​ទៅ​កាន់​សម្តេច​ហ៊ុន​ សែន​»​។
​លោក​ស្រី​ម៉ម​ ស៊ី​ថា​ប្រធាន​គណៈ​កម្មាធិការ​កម្ពុជា​ឯក​រាជ្យ​ស្ថាបន័​ពុក​រលួយ​បាន​មាន​ប្រសា​សន៍​ថា​ អាជ្ញាធរ​បាន​ប្រើ​ភាសា​មិន​ទទួល​ខុស​ត្រូវ​ទេ​ ក្នុង​ការ​គំរាម​កំហែង​ចង់​ចាប់​ប្រជាពល​រដ្ឋ​ជា​ច្រើន​លើក​ច្រើន​សារ​នេះ​។​ លោក​ស្រី​បន្ត​ថា​ ការ​តវ៉ា​ត្រូវ​បាន​ធ្វើ​ឡើង​ បន្ទាប់​ពី​គ្មាន​ការ​ដោះ​ស្រាយ​ ដូច្នេះ​ការ​គំរាម​កំហែង​ក្នុង​យុវគ្គ​សម័យ​នេះ​គេ​មិន​ទទួល​ឡើយ​។​ លោក​ស្រី​ថ្លែង​ថា​៖«​យើង​ នៅ​ឃ្លាំ​ចាំ​មើល​បញ្ហា​នេះ​បន្ត​ទៅ​ទៀត​ ហើយ​បើ​សិន​កើត​មាន​ករណី​ចាប់​ប្រជាពលរដ្ឋ​យក​ទៅ​ឃុំ​ឃាំង​មែន​នោះ​ យើង​និង​ចេញ​របាយ​ការណ៍​មួយ​ ដើម្បី​បង្ហាញ​ដល់​សាធារណៈ​អំពី​ករណី​នេះ​»​។​
           
           
           

Tuesday, July 5, 2011

ប្រជាពលរដ្ឋស្រុកបារាយណ៍ ខេត្តកំពង់ធំកំពុងប្រមូលស្នាមមេដៃ ដើម្បីរៀបចំបណ្តឹងដាក់ទៅកាន់សម្តេចហ៊ុន សែន


ដោយៈ ឃួន​ លក្ខិណា​

ថ្ងៃទី០៦ ខែ កក្តដា ឆ្នាំ២០១១
កំពង់ធំ៖ ប្រជាពល​រដ្ឋ​១៨៦​គ្រួសារ​ រស់​នៅ​ភូមិ​បាក់​ស្នា​ ឃុំ​បាក់​ស្នា​ ស្រុក​បារាយណ៍​ ខេត្ត​កំពង់​ធំ​ កាល​ពី​ថ្ងៃ​ម្សិល​មិញ​នេះ​ បាន​នំាគ្នា​បន្ត​យុទ្ធនា​ការ​ប្រមូល​ស្នាម​មេដៃ​ សម្រាប់​រៀប​ចំ​បណ្តឹង​ផ្ញើរ​ទៅ​កាន់​នាយក​រដ្ឋ​មន្ត្រី​ហ៊ុន​ សែន​ ដើម្បី​ស្នើ​សុំ​ឲ្យ​មាន​កិច្ច​អន្តរាគមន៍​ជា​បន្ទាន់​ លើ​ករណី​អាជ្ញាធរ​បាន​លួច​ឃុប​ឃិត​គ្នា​លក់​ដី​ប្រជាពល​រដ្ឋ​ទៅ​ឲ្យ​ម្ចាស់​ក្រុម​ហ៊ុន​មួយ​ ដែល​ជា​របស់​ប្រទេស​វៀត​ណាម​។​
            ប្រភព​ពី​ប្រជាពល​រដ្ឋ​រស់​នៅ​ភូមិ​បាក់​ស្នា​ បាន​អះ​អាង​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​អង្គារ​ថា​ ដី​នេះ​ ជា​ដី​ដើម​ភូមិ​ ដែល​មាន​ទំហំ​ប្រហែល​ជា​៣០​ហិតា​ ហើយ​ប្រជាពលរដ្ឋ​បាន​មក​រស់​នៅ​និង​ធ្វើ​ចំការ​តាំង​ពី​ឆ្នាំ​១៩៩៧​មក​ម្លេះ​ ក្រោយ​មក​មេឃុំ​ បាន​កាត់​ដី​ចំការ​ប្រជាពលរដ្ឋ​មួយ​ផ្នែក​ធំ​លក់​ទៅ​ឲ្យ​ក្រុម​ហ៊ុន​សុភង្គម​ ដើម្បី​ធ្វើ​អាជីវកម្ម​ដាំ​ដើម​អាកាស​ខ្សារ​។​ រហូត​មក​ដល់​ឆ្នាំ​២០០៨​ អាជ្ញាធរ​ក្នុង​តំបន់​ខាង​លើ​ បាន​ឃុប​ឃិត​គ្នា​ជាមួយ​និង​ម្ចាស់​ក្រុម​ហ៊ុន​មួយ​ទៀត ដែល​ជា​របស់​ប្រទេស​វៀត​ណាម​ បាន​យក​អាប៊ុល​ចំនួន​២​គ្រឿង​មក​ឈូស​ឆាយ​ផ្ទះ ​និង​ដី​ចំការ​របស់​ប្រជាពលរដ្ឋ​ ដោយ​បង្ខំ​ឲ្យ​ពួក​គេ​រើ​ចេញ​ពី​លំ​នៅ​ដ្ឋាន​នោះ​ជា​បន្ទាន់​។​
            តំណាង​ប្រជាពល​រដ្ឋ​រង​គ្រោះ​អ្នក​ស្រី​កង​ សូរ​ អាយុ​៦១ឆ្នាំ​ រស់​នៅ​ភូមិ​បាក់​ស្នា ​បាន​ប្រាប់​ឲ្យ​ដឹង​ថា​ អ្នកស្រី​គឺ​ជា​ជន​រង​គ្រោះ​ម្នាក់​ដែល​បាត់​បង់​ដី​អស់​ចំនួន​២​ហិតា​។​ អ្នក​ស្រី​បន្ត​ថា ​បន្ទាប់​ពី​មាន​ការ​ឈូស​ឆាយ​រួច​មក​ប្រជាពលរដ្ឋ​បាន​នាំគ្នា​ឡើង​ទៅ​តវ៉ា​នៅ​សាលា​ខេត្ត​ ដើម្បី​ស្នើ​ឲ្យ​អាជ្ញាធរ​ធ្វើ​ការ​ដោះ​ស្រាយ​បញ្ហា​វិវាទ​នេះ​ ប៉ុន្តែ​អាជ្ញាធរ​ខេត្ត​បាន​ស្នើ​ឲ្យ​ប្រជាពលរដ្ឋ​១៨៦​គ្រួសា​រនេះ​ ត្រូវ​ធ្វើការ​ដោះ​ដូរ​រវាង​ដី​នៅ​ខាង​ដើម​ភូមិ​ ឲ្យ​ទៅ​រស់​នៅ​លើ​ដី​ចុង​ភូមិ​វិញ​ ដោយ​ក្នុង​១​គ្រួសារ​ត្រូវ​ទទួល​បាន​ដី​ទំហំ​ក្បាល​៤០​គុណ​៥០ម៉ែត្រ​។​ អ្នក​ស្រី​និយាយ​ថា​៖« ​ពួក​យើង​ព្រម​ធ្វើការ​ដោះ​ដូរ ប្រសិន​បើ​អាជ្ញា​ធរ​បាន​គោរព​ទៅ​តាម​កិច្ច​សន្យា​របស់​ខ្លួន​ឲ្យ​បាន​ត្រឹម​ត្រូវ​នោះ​»​។
            អ្នក​ស្រី​ម៉ម​ ស៊ីថា​ ប្រធាន​គណៈ​កម្មាធិការ​កម្ពុជា​ឯក​រាជ្យ​ស្ថាបន័​ពុក​រលួយ​បាន​មាន​ប្រសា​សន៍​ថា​ អ្នក​ស្រី​បាន​រក​ឃើញ​ថា​ អាជ្ញាធរ​មិន​បាន​គោរព​ទៅ​តាម​ការ​សន្យា​របស់​ខ្លួន​ទេ​ ព្រោះ​គាត់​ បាន​សន្យា​ថា​ និង​ធ្វើការ​ដោះ​ស្រាយ​ឲ្យ​ប្រជាពលរដ្ឋ​ចំនួន​១៨៦​គ្រួសារ​នេះ​ ប៉ុន្តែ​ធាតុ​ពិត​មាន​តែ​១១៤​គ្រួសារ​ប៉ុណ្ណោះ​ ដែល​មាន​ឈ្មោះ​ត្រូវ​បាន​កាន់​កាប់​ដី​នៅ​តំបន់​ថ្មី​។​ អ្នក​ស្រី​និយាយ​ថា​៖«​អស់​រយៈ​ពេល​៤ឆ្នាំ​ហើយ​ ប្រជាពលរដ្ឋ​ចំនួន​១១៤​គ្រួសារ​នេះ​ នៅ​តែ​មិន​ទាន់​ទទួល​បាន​សិទ្ធ​កាន់​កាប់​ដី​ធ្លី​នៅ​ឡើយ​ទេ​ ដូច្នេះ​ឥឡូវ​នេះ​ជន​រង​គ្រោះ​ទាំង​១៨៦​គ្រួសារ​ បាន​នាំគ្នា​រៀបចំ​គំរោង​ប្តឹង​សារ​ជា​ថ្មី​ម្តង​ទៀត​ ដើម្បី​ទាម​ទារ​ការ​សន្យា​របស់​អាជ្ញាធរ​។​ អ្នក​ស្រី​ថា​៖«​យើង​និង​តាម​ជួយ​ប្រជាពលរដ្ឋ​តាម​រយៈ​ការ​ជួយ​រៀបចំ​ពាក្យ​បណ្តឹង​ និង​ការ​ណែ​នាំ​ឲ្យ​ពួក​គាត់​ធ្វើការ​ដោះ​ស្រាយ​ដោយ​សន្តិវិធី​ រឺ​តាម​ផ្លូវ​ច្បាប់​»​។​
            លោក​លី​ គឹម​ទាវ​ប្រធាន​គណៈ​កម្មាធិការ​ដោះ​ស្រាយ​វិវាទ​ដី​ធ្លី​ខេត្ត​កំពង់​ធំ​ បាន​មាន​ប្រសា​សន៍​ថា​ បញ្ហា​នេះ​ត្រូវ​បាន​ដោះ​ស្រាយ​ចប់​ជា​ស្ថាពរ​ ហើយ​ប្រជាពលរដ្ឋ​១១៤​គ្រួសារ​នេះ​ ក៏​ស្មគ្រ័​ចិត្ត​ទទួក​យក​សំណើរ​របស់​ខេត្ត​ដែរ​ ប៉ុន្តែ​មាន​ជន​មេក្លោង​មួយ​ចំនួន​ទៀត​ នៅ​តែ​ចាំ​បង្ក​បញ្ហា​ធ្វើ​ឲ្យ​ប្រជា​ពលរដ្ឋ​មាន​ការ​បោះ​បោរ​ប្រឆាំង​និង​អាជ្ញាធរ​ ដូច្នេះ​នៅ​ពីរ​បី​ថ្ងៃ​ទៀត​នេះ​ លោក​និង​ចាប់​ពួក​មេ​ក្លោង​ទាំង​នោះ​យក​ទៅ​ដាក់​គុក ​ដើម្បី​ព្រមាន​ជា​មិន​ខាន​»​។​ លោក​ថ្លែង​ថា៖«​យើង​មិន​ទាន់​ដឹង​ធ្វើ​យ៉ាង​ម្តេច​ទៀត​ទេ​ ដូច្នេះ​យើង​នៅ​រង់​ចាំ​ការ​ចង្អុល​បង្ហាញ​ពី​ខាង​ថ្នាក់​លើ​ទៀត​។​ លោក​ថា​៖«​ខ្ញុំ​ មិន​អាច​បញ្ជាក់​ដល់​អ្នក​កាសែត​បាន​ទេ​ ថា​ដី​នេះ​ក្រុម​ហ៊ុន​មួយ​ណា​ជា​អ្នក​ទិញ​ រឺ​គម្រោង​ចង់​អភិវឌ្ឍ​ន៍​ធ្វើអ្វី​បន្ត​ទៀត​នោះ​។​
            លោក​ម៉ី​ សារឿន​ មេ​ឃុំ​បាក់​ស្នា​ បាន​មាន​ប្រសាសន៍​ថា​ លោក​មិន​បាន​ដឹង​អំពី​ចំនួន​សរុប​
របស់​ប្រជាពល​រដ្ឋ​នៅ​តំបន់​កើត​ហេតុ​ខាង​លើ​ទេ​ ប៉ុន្តែ​នៅ​ក្នុង​ពាក្យ​បណ្តឹង​ប្រជាពលរដ្ឋ​មាន​មនុស្ស​ ត្រឹម​តែ​១១៤​គ្រួសារ​ប៉ុណ្ណោះ​។​ លោក​ថ្លែង​ថា​៖«​ខ្ញុំ​មិន​ដឹង​ថា​មាន​រឿង​អ្វី​នោះ​ទេ​ បាន​ជា​ប្រជាពល​រដ្ឋ​ទាំង​នោះ​ចោទ​ប្រកាន់​ខ្ញុំ​ថា​ ជា​អ្នក​លក់​ដី​ទៅ​ឲ្យ​ក្រុម​ហ៊ុន​ទៅ​វិញ​ ធាតុ​ពិត​គឺ​ខ្ញុំ​មិន​បាន​អ្វី​ទេ​»​។​
            លោក​ឈុន​ ឈាន់​អភិបាល​ខេត្ត​កំពង់​ធំ​មិន​បាន​ធ្វើ​អត្ថាធិ​ប្បាយ​ទេ​ ព្រោះ​បិទ​ទូរ​សព្ទ័​។​
           
           
           

Thursday, June 30, 2011

អាជ្ញាធរខេត្តប៉ៃលីនបានដាក់កំលាំងស៊ើបអង្កេតជាសំងាត់នៅតាមគោលដៅ ដើម្បីទប់ស្កាត់ការធ្វើំចំណាកស្រុកដោយខុសច្បាប់

ដោយៈ ឃួន​ លក្ខិណា​

ថ្ងៃទី៣០ ខែមិថុនា ឆ្នាំ២០១១
ប៉ៃ​លីន៖ អាជ្ញាធរ​ខេត្ត​ប៉ៃលិន​បាន​រៀប​ចំ​កំលាំង​សំងាត់​ដាក់​នៅ​តាម​គោល​ដៅ​ ដែល​មាន​ទីផ្សារ និង​ទី​ប្រជុំជន​គ្រប់​កន្លែង​ ដើម្បី​ឃ្លាំ​ចាំ​មើល​ជន​ចំណាក​ស្រុក​ដែល​ត្រៀម​ឆ្លង​ដែន​ខុស​ច្បាប់​ទៅ​រក​ការ​ងារ​ធ្វើ​នៅ​ប្រទេស​ថៃ​។​
         លោក​សំ​ សេង​លី​នាយ​ប៉ុស្តិ៍​នគរបាល​អន្តោ​ប្រវេសន៍​ប្រចាំ​ច្រក​ព្រំដែន​ខេត្ត​ប៉ៃលិន​បាន​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​ព្រហស្បត្តិ៍​ថា​ លោក​បាន​បង្កើន​ការ​យក​ចិត្ត​ទុក​ដាក់​ខ្ពស់​ក្នុង​ការ​ទប់​ស្កាត់​បទ​ល្មើស​ឆ្លង​ដែន​ខុស​ច្បាប់​របស់​ពលករ​កម្ពុជា​ទៅ​ប្រទេស​ថៃ​ ដើម្បី​ស្វែង​រក​ការ​ងារ​ធ្វើ​។ ​
លោក​បន្ត​ថា​ ដើម្បី​ចូល​រួម​ទប់​ស្កាត់​បទ​ល្មើស​ខាង​លើ​នេះ​ អាជ្ញាធរ​ខេត្ត​បាន​សម្រច​រៀប​ចំ​ជា​វិធាន​ការណ៍​មួយ​ទៀត​ ដោយ​ដាក់​កំលាំង​ស៊ើប​អង្កេត​ជា​សំងាត់​នៅ​តាម​គោល​ដៅ​ ដែល​មាន​ទីផ្សារ​រ និង​ទី​ប្រជុំជន​ជាដើម​ ដើម្បី​ឃ្លាំ​ចាំ​មើល​ពលរដ្ឋ​ខ្មែរ​ដែល​ត្រៀម​ធ្វើ​ដំណើរ​ទៅ​ធ្វើ​ការ​នៅ​ប្រទេស​ថៃ​ដោយ​ខុស​ច្បាប់​។​ លោក​ថ្លែង​ថា​៖«​កន្លង​មក​នេះ​ កំលាំង​ចលត័​របស់​យើង​បាន​ដើរ​ល្បាត​នៅ​ត្រង់​តំបន់​អូរ​ព្រំដែន​ ក្រោយ​មក​ពួក​គេ​បាន​រាយការណ៍​ថា​ មាន​ពលរដ្ឋ​ខ្មែរ​មួយ​ចំនួន​បាន​ជិះ​ទូ​ក​ឆ្លង​ដែន​ទៅ​ប្រទេស​ថៃ​ខុស​ច្បាប់​ ដើម្បី​ស៊ី​ឈ្មួល​ជា​កសិករ​ធ្វើ​ចំការ​ឲ្យ​គេ​។​ លោក​ថា​ យើង​ធ្លាប់​បាន​ប្រាប់​ប្រជាពលរដ្ឋ​អំពី​គ្រោះ​ថ្នាក់​និង​ហានីភ័យ​ក្នុង​ការ​ធ្វើ​ចំណាក​ស្រុក​ដោយ​ខុស​ច្បាប់​ទៅ​រក​ការ​ងារ​ធ្វើ​នៅ​ប្រទេស​ផ្សេង​ៗ​ ប៉ុន្តែ​ពួក​គេ​តែង​ជឿ​លើ​ការ​លួង​លោម​របស់​មេ​ខ្យល់​ច្រើន​ជាង​ការ​នែនាំ​របស់​ យើង​»​។​
            ពាក់​ពន្ធ័​និង​បញ្ហា​នេះ​កាល​ពី​ថ្ងៃទី​២៥​ ខែ​មិថុនា​ ឆ្នាំ​២០១១​ សមត្ថកិច្ច​ខេត្ត​ប៉ៃលិន​ និង​អាជ្ញាធរ​ថៃ​ បាន​សហការ​គ្នា​ ចុះ​ឃាត់​ខ្លួន​ពលករ​ឆ្លង​ដែន​ខុស​ច្បាប់​ដែល​ត្រៀម​ទៅ​ធ្វើ​ការ​ងា​រ​នៅ​ប្រទេស​ថៃ​តាម​រយៈ​មេ​ខ្យល់​បាន​ចំនួន​៨៤នាក់​ ដែល​បាន​មក​ប្រមូល​ផ្តុំ​គ្នា​នៅ​ម្តុំ​ភូមិ​ផាកាត​ ឃុំ​ខ្លង​យ៉ៃ​ ស្រុក​ពង​ណាំ​រ៉ន​ ខេត្ត​ចន្ទ័​បូរី​ ប្រទេស​ថៃ​។​
           


Wednesday, June 29, 2011

​​​​​​សុខចិត្តយកប្លង់ដីនិងផ្ទះដាក់បញ្ចាំនៅធានាគារ ដើម្បីឲ្យបានរួចទោសពីការប្តឹងរបស់បុគ្គលិកក្រុមហ៊ុនស្រាបៀរANCHOR

ដោយៈ ឃួន​ លក្ខិណា​

ថ្ងៃទី២៩ ខែមិថុនា ឆ្នាំ២០១១

បន្ទាយ​មាន​ជ័យ៖​ បុរស​ម្នាក់​ដែល​បាន​រង​ការ​ចោទ​ប្រកាន់​ពី​បទ​ក្លែង​បន្លំ​សំបក​កំប៉ុង​ស្រាបៀរ​ANCH​OR​ បាន​បង្ខំ​ចិត្ត​យក​ទ្រព្យ​សម្បត្តិ​របស់​ខ្លួន​ដាក់​បញ្ជំា​ឲ្យ​ធានាគារ​អេស៊ីលីដា​ ដើម្បី​យក​លុយ​មក​សង​បំណុល​ឲ្យ​បុគ្គលិក​ក្រុម​ហ៊ុន​ស្រាបៀរ​ខាង​លើ​នេះ​ ជា​ថ្ងូរ​និង​ការ​បាន​រួច​ទោស​។​
            លោក​កាន់​ វណ្ណ​ថង​ អាយុ​២៥ឆ្នាំ​ រស់​នៅ​ភូមិ​ចក្រី​ ឃុំ​ជប់​វ៉ារី​ ស្រុក​ព្រះ​នេត្យ​ព្រះ ​ខេត្ត​បន្ទាយ​ មាន​ជ័យ​បាន​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​ពុធ​ថា​ ដើម្បី​បញ្ចប់​រឿង​ លោក​សុខ​ចិត្ត​យក​ប្លង់​ដី​ប្លង់​ផ្ទះ​ទៅ​បញ្ជាំ​ធានាគារ​ ដើម្បី​បាន​លុយ​យក​មក​សង​ឲ្យ​ឈ្មោះ​ប៊ុន រិន​ ដែល​ជា​ម្ចាស់​ដេប៉ូ​ក្រុម​ហ៊ុន​ស្រា​បៀវ​ANCHOR​ ខេត្ត​បន្ទាយ​មាន​ជ័យ​ សម្រាប់​ជា​ថ្ងូរ​ឲ្យ​បាន​រួច​ទោស​ពី​ការ​ចោទ​ប្រកាន់​លើ​បទ​ក្លែង​បន្លំ​សំបក​កំប៉ុង​ស្រាបៀរ​។​ លោក​បន្ត​ថា​ លោក​សូម​ធ្វើ​ការ​បដិសេធ​បញ្ហា​នេះ​ ព្រោះ​លោក​មិន​មែន​ជា​មនុស្ស​ចេះ​ក្លែង​បន្លំ​សំបក​កំប៉ុង​ដែល​មាន​រង្វាន់​ឡើយ​។​
កាល​ពី​៣​ខែ​មុន​ឈ្មោះ​វណ្ណ​ ថង​ បាន​ទៅ​ទិញ​ស្រា​បៀរ​ANCHOR​ ពី​កន្លែង​លក់​ចាប​ហួយ​ មួយ​កន្លែង​ក្បែរ​ផ្សារ​ចក្រី​ ដើម្បី​យក​មក​ផឹក​ស៊ី​ជាមួយ​មិត្ត​ភក្ត័​ ក្រោយ​មក​លោក​បាន​គាស់​ក្រវិល​កំប៉ុង​ឃើញ​មាន​ផ្លាក​អាក្ខរ​A​ រួច​ក៏​ទៅ​សួរ​ម្ចាស់​លក់​ចាប​ហ៊ួយ​នោះ​អំពី​ការ​ត្រូវ​រង្វាន់​ ក្រោយ​មក​គេ​បាន​ប្រាប់​ថា​ ពិត​ជា​ត្រូវ​បាន​រង្វាន់​ធំ​១០​លាន​រៀល​»​។​ លោក​ថា​៖«​ខ្ញុំ​បាន​កាន់​ក្រវិល​កំប៉ុង​ទៅ​បើក​រង្វាន់​ធំ​នៅ​សាខា​ស្ថិត​ក្នុង​ទី​រួម​ខេត្ត​បន្ទាយ​មាន​ជ័យ​ពី​ឈ្មោះ​ប៊ុន​ រិន​ជា​ម្ចាស់​ដេប៉ូ​»​។​
លោក​វណ្ណ​ ថង​បាន​បញ្ជាក់​ថា​៖«​លោក​ប៊ុន​ រិន​បាន​បើក​លុយ​ឲ្យ​ខ្ញុំ​ដោយ​មិន​មាន​លិខិត​ទទួល​លុយ​ឡើយ​ ក្នុង​នោះ​គេ​បាន​បើក​ឲ្យ​ខ្ញុំ​ចំនួន​ត្រឹម​តែ​៩លាន​រៀល​ទេ​ ដោយ​១​លាន​រៀល​ទៀត​ត្រូវ​បាន​ផាត​លើ​ថ្លៃ​ហត់​នឿយ​។​ ៥​ថ្ងៃ​ក្រោយ​មក​ឈ្មោះ​ប៊ុន រិន​បាន​ហៅ​ខ្ញុំ​ម្តង​ទៀត​ ដើម្បី​ឲ្យ​ខ្ញុំ​ធ្វើ​ដំណើរ​ទៅ​ទី​ក្រុង​ភ្នំពេញ​ថត​ផ្សាយ​តាម​ទូរ​ទស្សន៍​អំពី​ការ​ត្រូវ​រង្វាន់​ធំ​ ព្រម​ទាំង​បង្ខំ​ឲ្យ​ខ្ញុំ​ចុះ​ហត្ថលេ​ខា​លើ​ក្រដាស​មួយ​សន្លឹក​ ដោយ​សរ​សេរ​អំពី​ការ​ខ្ចី​លុយ​ចំនួន​១០​លាន​រៀល​នេះ​ ប៉ុន្តែ​គេ​បាន​ដក​ហូត​ម៉ូតូ​ខ្ញុំ​ទុក​មិន​ឲ្យ​ឡើយ​ លុះ​ត្រា​តែ​ខ្ញុំ​បាន​បើក​លុយ​រង្វាន់​ធំ​ពី​ភ្នំពេញ​មក​ឲ្យ​គាត់​។​ លោក​ថា​៖«​ពេល​មក​ដល់​ភ្នំពេញ​ ស្រាប់​តែ​ក្រុម​ហ៊ុន​ស្រាបៀរ​ANCHOR​បាន​ចោទ​ប្រកាន់​ថា​ ខ្ញុំ​ជា​អ្នក​ក្លែង​បន្លំ​សំបក​កំប៉ុង​ទៅ​វិញ​»​។​
​អ្នក​ស្រី​លាវ​ ស៊ុន​ហ៊ូរ​ម្ចាស់​លក់​ចាប​ហ៊ួយ​និង​ស្រាបៀរ​ANCHOR​ក្បែរ​ផ្សារ​ចក្រី​ បាន​ប្រាប់​ឲ្យ​ដឹង​ថា​ អ្នក​ស្រី​ពិត​ជា​បាន​លក់​ស្រាបៀរ​ ANCHOR​ កន្លះ​កេស​ឲ្យ​ទៅ​ឈ្មោះ​វណ្ណ​ថង​ប្រាកដ​មែន​។​ អ្នក​ស្រី​បន្ត​ថា​ ប្រហែល​បាន​ពីរ​ថ្ងៃ​ក្រោយ​មក​ ស្រាប់​តែ​ឈ្មោះ​វណ្ណ​ ថង​បាន​មក​ប្រាប់​អ្នក​ស្រី​ថា​ គាត់​បាន​ត្រូវ​រង្វាន់​១០​លាន​រៀល​ពី​សំបក​កំប៉ុង​ក្រុម​ហ៊ុន​ស្រាបៀរ​ANCHOR​។​ អ្នក​ស្រី​និយាយ​ថា​៖«​ខ្ញុំ​មិន​បាន​ត្រួត​ពិនិត្យ​មើល​សំបក​កំប៉ុង​ដែល​គាត់​ត្រូវ​រង្វាន់​នោះ​ទេ​ ប៉ុន្តែ​ខ្ញុំ​បាន​ប្រាប់​ឲ្យ​គាត់​យក​សំបក​កំប៉ុង​នោះ​ ទៅ​បើក​នៅ​ឯទី​រួម​ខេត្ត​ ព្រោះ​ដេប៉ូ​ធំ​នៅ​ទី​នោះ​អាច​បើក​រង្វាន់​ឲ្យ​គាត់​បាន​»​។​
បើ​តាម​លោក​ម្នាក់​ឈ្មោះ​ចាន់​ រ៉ា​ អ្នក​ជិត​ខាង​រស់​នៅ​ភូមិ​-​ឃុំ​ជាមួយ​គ្នា​បាន​ប្រាប់​ថា​ កាល​ពី​ពាក់​កណ្តាល​ខែ​មិនា​ លោក​វណ្ណ​ ថន​ ពិត​ជា​បាន​យក​ក្រវិល​កំប៉ុង​បង្ហាញ​លោក​មែន​ ហើយ​និយាយ​ប្រាប់​ថា​ នេះ​គឺ​ជា​កំប៉ុង​ដែល​ត្រូវ​រង្វាន់​ធំ​។​ លោក​ថ្លែង​ថា​៖«​ ខ្ញុំ​មិន​បាន​ដឹង​ទេ​ថា​ នោះ​គឺ​ជា​រង្វាន់​អ្វី​ទេ​ ព្រោះ​ក្រវិល​កំប៉ុង​នោះ​សរ​សេរ​ជា​អក្សរ​អង្គ​គ្លេស​»​។​
លោក​ប៊ុន​ រិន​ម្ចាស់​ដេប៉ូ​ស្រាបៀរ​ANCHOR​ ខេត្ត​បន្ទាយ​មាន​ជ័យ​ មិន​បាន​លើក​ទូរ​សព្ទ័​ទេ​កាល​ពី​ថ្ងៃ​ម្សិល​មិញ​នេះ​ ប៉ុន្តែ​បើ​តាម​កញ្ញា​សោភណ្ឌ័​ បុគ្គ​លិក​ផ្នែក​គណនេយ្យ​នៅ​ដេប៉ូ​ស្រាបៀរ​ANCHOR​បាន​ប្រាប់​ឲ្យ​ដឹង​ថា​ កញ្ញា​បាន​លឺ​ម្ចាស់​ដេប៉ូ​និយាយ​អំពី​បញ្ហា​មាន​អ្នក​ក្លែង​បន្លំ​សំបក​កំប៉ុង​ស្រាបៀវ​ANCHOR​ប្រាកដ​មែន​ ប៉ុន្តែ​កញ្ញា​មិន​បាន​លឺ​ម្ចាស់​ដេប៉ូ​និយាយ​អំពី​ការ​ដាក់​ពាក្យ​ប្តឹង​លើ​អ្នក​ណា​ម្នាក់​ឡើយ​។​



           
           
           



Tuesday, June 28, 2011

ក្រសួងផែនការត្រូវការថវិការបន្ថែមដើម្បីរៀបចំការអង្កេតចន្លោះជំរឿនឆ្នាំ២០១៣

ដោយៈ ឃួន​ លក្ខិណា​

ថ្ងៃទី២៨ ខែមិថុនា ឆ្នាំ២០១១
ភ្នំពេញ​៖ ក្រសួង​ផែន​ការ​កំពុង​ស្វែង​រក​ថវិការ​ពី​អង្គការ​ដៃគូរ​អភិវឌ្ឍន៍​ឲ្យ​បាន​គ្រប់​តាម​ផែន​ការ​ ដើម្បី​រៀប​ចំ​ការ​ធ្វើ​អង្កេត​ចន្លោះ​ជំរឿ​នៃ​ប្រជា​រាស្រ្ត​កម្ពុជា​នៅ​ឆ្នាំ​២០១៣​។
     លោក​សន​ ស៊ី​ថន​ អគ្គ​លេខាធិការ​ទទួល​បន្ទុក​ស្ថិតិ​នៃ​ក្រសួង​ផែន​ការ​បាន​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​អង្គារ​ថា​ ក្រសួង​ផែន​ការ​ត្រូវ​ការ​ថវិការ​ប្រមាណ​៦៩៨.៨១៧​ដុល្លា​ ដើម្បី​ការ​អង្កេត​ចន្លោះ ​ជំរឿន​ឆ្នាំ​២០១៣​ និង​ផ្តល់​ព័ត៌​មាន​សំខាន់​ៗ​ សម្រាប់​ធ្វើ​បច្ចុប្បន្ន​ភាព​ សូច​នាករ​មួយ​ចំនួន​។​ លោក​ បន្ត​ថា​ ការ​ធ្វើ​អង្កេត​ចន្លោះ​ជំរឿន​អាច​និង​ប្រព្រឹត្ត​ទៅ​នៅ​ខែ​មិនា​ ឆ្នាំ​២០១៣​ ដោយ​ត្រូវ​អនុវត្ត​ត្រឹម​តែ​២​សប្តាហ៍​ប៉ុណ្ណោះ​ ក្នុង​នោះ​ត្រូវ​ជ្រើស​រើស​គំរូ​ចំនួន​២៨.៦៨០​គ្រួសារ​នៅ​ទូ​ទាំង​ប្រទេស​។​ លោក​ថ្លែង​ថា​៖«​យើង​គ្រោង​ដាក់​មន្រ្តី​សភាន៍​ចំនួន​៩៥៦នាក់​ និង​មន្ត្រី​ត្រួត​ពិនិត្យ​ចំនួន​៣១៩នាក់​ សម្រាប់​ការ​ធ្វើ​អង្កេត​ឆ្នាំ​២០១៣​»​។​លោក​ថា​ កិច្ច​ការ​នេះ​គឺ​ជា​រឿង​ចាំ​បាច់​ណាស់​ ដើម្បី​ធ្វើការ​តាម​ដាន​ការ​ប្រែប្រួល​រចនា​សម្ពន្ធ័​ប្រជាជន​ និង​សមាស​ភាគ​ប្រជាជន​ ចំនួន​ និង​គុណ​ភាព​នៃ​កម្លាំង​ពលកម្ម​ អក្ខរ​កម្ម​ និង​កម្រិត​វប្បធម៌​ ប្រភេទ​អាគារ​ និង​លំនៅ​ដ្ឋាន​ រួម​និង​ស្ថាន​ភាព​សេដ្ឋ​កិច្ច​ សង្គម​កិច្ច​ទូទៅ ​និង​ស្ថាន​ភាព​ជីវភាព​រស់​នៅ​របស់​ប្រជាជន​»​។​
     ទាក់​ទង​និង​លទ្ធ​ផល​ទូទៅ​ នៃ​ការ​អង្កេត​ចន្លោះ​ជំរឿន​នៃ​ប្រជា​រាស្រ្ត​ឆ្នាំ​២០១៣​ និង​ត្រូវ​ប្រកាស​ផ្សាយ​នៅ​ខែ​វិច្ឆិកា​ ឆ្នាំ​២០១៣​ ហើយ​ការ​ផ្សព្វ​ផ្សាយ​និង​មាន​វិសាល​ភាព​ទូលំ​ទូលាយ​ដល់​ ក្រសួង​ ស្ថាបន័​ និង​រាជ​ធានី​/​ខេត្ត​ និង​ត្រូវ​ធ្វើ​ក្នុង​រយៈ​ពេល​២​ខែ​ ចាប់​ពី​ខែ​ធ្នូ ​ឆ្នាំ​២០១៣​។​
     លោក​សន​ ស៊ី​ថន​ បញ្ជាក់​ថា​៖«​បច្ចុប្បន្ន​ថវិការ​សម្រាប់​អនុវត្ត​លើ​ការ​ងារ​នេះ​ អង្គការ​UNFPA​ និង​អង្គ​ការ​ Jica​ បាន​ធ្វើ​ការ​ឧបត្ថម្ភ​បាន​មួយ​ចំនួន​ធំ​ហើយ​  ប៉ុន្តែ​យើង​នៅ​ខ្វះ​តែ​បន្តិច​បន្តួច​ប៉ុណ្ណោះ​ ដូច្នេះ​ទើប​ថ្ងៃ​ម្សិល​មិញ​នេះ​ ក្រសួង​បាន​ធ្វើការ​អំពាវនាវ​ស្នើ​សុំ​ថវិការ​បន្ថែម​ទៀត​ពី​អង្គការ​ដៃ​គូរ​មួយ​ចំនួន​តាម​រយៈ​សិក្ខា​សាលា​ប្រមែ​ប្រមូល​ធន​ធាន​សម្រាប់​ការ​ងារ​អង្កេត​នេះ​»​។​
     លោក​ទេស​រដ្ឋ​មន្រ្តី​ឆាយ​ ថន​ រដ្ឋ​មន្ត្រី​ក្រសួង​ផែន​ការ​បាន​មាន​ប្រសាសន៍​ថា​ ការ​អង្កេត​ចន្លោះ​ជំរឿន​គឺ​ជា​សកម្មភាព​មួយ​បន្ត​ក្នុង​រយៈ​ពេល​៥ឆ្នាំ​ ក្រោយ​ពី​ជំរឿន​ដែល​មាន​សារៈ​សំខាន់​ សម្រាប់​ការ​ផ្ទៀង​ផ្ទាត់​ តាម​ដាន​ភាព​រីក​ចម្រើន​ និង​ការ​អភិវឌ្ឍ​របស់​ប្រទេស​។​ លោក​បន្ត​ថា​ រាជ​រដ្ឋា​ ភិបាល​ត្រូវ​ការ​ទិន្ន​ន័យ​សម្រាប់​គោល​ដៅ​ជា​ច្រើន​ដូច​ជា​ ធ្វើ​ផែន​ការ​អភិវឌ្ឍន៍​ជាតិ​ រៀបចំ​គោល​នយោបាយ​ផ្សេង​ៗ​ តាម​ដាន​ការ​អភិវឌ្ឍ​គោល​ដៅ​អភិវឌ្ឍ​សហស្សវត្សរ៍​ និង​ការ​ធ្វើ​សេចក្តី​សម្រេច​របស់​រដ្ឋាភិបាល​ក្នុង​ការ​ផ្តល់​នូវ​វិធានការ​លើក​ដំកើន​សុខុមាល​ភាព​ផ្សេង​ៗ​។​ លោក​ថ្លែង​ថា​៖«​ខ្ញុំ​ជឿ​ ជាក់​ថា​ ឆ្លង​កាត់​តាម​ការ​ពិភាក្សា​ជា​មួយ​និង​អង្គ​ការ​ដៃ​គូរ​កាល​ពី​ម្សិល​មិញ​នេះ​ គឺ​ជា​មូល​ដ្ឋាន​រឹង​មាំ​ ក្នុង​ការ​ទាក់​ទាញ​គៀង​គរ​ ធន​ធាន​ហិរញ្ញវត្ថុ​ និង​ជំនួយ​បច្ចេក​ទេស​ សម្រាប់​ជោគ​ជ័យ​នៃ​ការ​ធ្វើ​អង្កេត​ចន្លោះ​ជំរឿន​នៃ​ប្រជារាស្រ្ត​កម្ពុជា​ឆ្នាំ​២០១៣​នា​ពេល​ខាង​មុខ​»​។​
     គួរ​បញ្ជាក់​ថា​ ការ​ធ្វើ​អង្កេត​ចន្លោះ​ជំរឿន​ឆ្នាំ​២០១៣​នេះ​ គឺ​ជា​លើក​ទី២​ហើយ​សម្រាប់​កម្ពុជា​ ដែល​លើក​ទី​១​ កម្ពុជា​ធ្លាប់​បាន​ធ្វើ​ម្តង​រួច​មក​ហើយ​កាល​ពី​ឆ្នាំ​២០០៤​ កន្លង​មក​នេះ​។​
           
           
           
           
           

Monday, June 27, 2011

អាជ្ញាធរកម្ពុជាកំពុងស្វែងរកចាប់ខ្លួនក្រុមមេខ្យល់ដែលនាំពលករ៨៤នាក់ទៅធ្វើការងារនៅប្រទេសថៃខុសច្បាប់

ដោយៈ ឃួន​ លក្ខិណា​

ថ្ងៃទី២៧ ខែមិថុនា ឆ្នាំ២០១១
ប៉ៃលិន​៖ ​ អាជ្ញាធរ​ខេត្ត​ប៉ៃលិន​បាន​ប្រាប់​ឲ្យ​ដឹង​កាល​ពី​ថ្ងៃ​ចន្ទ័​ថា​ ពួកគេ​កំពុង​ស្វែង​រក​ចាប់​ខ្លួន​ក្រុម​មេ​ខ្យល់​ ដែល​នាំ​ពលករ​ខែ្មរ​ខុស​ច្បាប់​ប្រមាណ​៨៤នាក់​មក​ពី​តំបន់​ផ្សេង​គ្នា​ ទៅ​ធ្វើ​ចំណាក​ស្រុក​នៅ​ប្រទេស​ថៃ​ដោយ​ខុស​ច្បាប់​ កាល​ពី​ចុង​សបា្តហ៍​មុន​នេះ​។​
     ប្រភព​ពី​សមត្ថកិច្ច​ខេត្ត​ប៉ៃលិន​បាន​ថ្លែង​ប្រាប់​ភ្នំពេញ​ប៉ុស្តិ៍​ថា​ ក្រុម​សមត្ថកិច្ចចំរុះ ​ដែល​មាន​ការិយា​ល័យ​ប្រឆាំង​បទ​ល្មើស​ជួញ​ដូរ​មនុស្ស​ និង​ការ​ពារ​អនិតិជន​ រួម​ជាមួយ​សមត្ថកិច្ច​ការ​ពារ​ច្រក​ទ្វា​ព្រំដែន​អន្តរ​ជាតិ​ខេត្តប៉ៃលីន​ បាន​សហការ​ជាមួយ​និង​ស្នង​ការ​ខេត្ត​ ដើម្បី​ធ្វើ​ការ​ស្រាវ​ជ្រាវ​ស្វែង​រក​ក្រុម​មេ​ខ្យល់​ដែល​នាំ​ពលរដ្ឋ​ខ្មែរ ​ឆ្លង​ដែន​ខុស​ច្បាប់​ទៅរក​ការ​ងារ​ធ្វើ​នៅ​ប្រទេស​ថៃ​។​
     កាល​ពី​ថ្ងៃទី​២៤​ ខែ​មិថុនា​ ឆ្នាំ​២០១១​ អាជ្ញាធរ​កម្ពុជា​និង​សមត្ថកិច្ច​ថៃ​បាន​ដឹក​នាំ​កំលាំង​ចុះ​បង្ក្រាប​ពលករ​ ខ្មែរ​លួច​ឆ្លង​ដែន​ខុស​ច្បាប់​ ដើម្បី​ទៅ​រក​ការ​ងារ​ធ្វើ​នៅ​ប្រទេស​ថៃ​។​
     លោក​សំ​ សេង​លី​នាយ​ប៉ុស្តិ៍​នគរបាល​អន្តោ​ប្រវេសន៍​ច្រក​ទ្វារ​ព្រំ​ដែន​ ខេត្ត​ប៉ៃលិន​បាន​មាន​ ប្រសាសន៍​ថា​  កាល​ពី​សប្តាហ៍​មុន​នេះ​ លោក​បាន​ដឹក​នាំ​កំលាំង​ចុះ​ទៅ​បង្ក្រាប​ករណី​លួច​ឆ្លង​ដែន​ខុស​ច្បាប់​របស់ ​ពលករ​ខ្មែរ​ ក្នុង​នោះ​ប្រមូល​បាន​មនុស្ស​ចំនួន​៨៤នាក់​ ស្រី​៣១​នាក់​។​ លោក​បន្ត​ថា​  មុន​ពេល​កើត​ហេតុ​ លោក​បាន​ទទួល​សេចក្តីរាយ​ការណ៍​មួយ​ ចេញ​ពី​សមត្ថកិច្ច​នៅ​ច្រក​ទ្វា​ព្រំដែន​ថៃ​ ដោយ​ពួក​គេ​បាន​រាយការណ៍​ប្រាប់​លោក​ថា​ និង​មាន​មនុស្ស​ប្រមាណ​ច្រើន​ជាង​៥០​នាក់​គ្រោង​និង​ចូល​មក​ទឹក​ដី​ថៃ​ដោយ​ ខុស​ច្បាប់​ ដូច្នេះ​ខាង​ថៃ​បាន​ស្នើ​ឲ្យ​លោក​ដាក់​កំលាំង​បង្ក្រាប​ជា​បន្ទាន់​។​ លោក​ថ្លែង​ថា​៖«​ដោយ​មាន​ការ​សហការ​ពី​សមត្ថកិច្ច​ថៃ​ នៅ​វេលា​ម៉ោង​១៨​និង​១០​នាទី​ ថ្ងៃ​ទី​២៤​ ខែ​មិថុនា​ សមត្ថកិច្ច​យើង​និង​ប៉ូលីស​ថៃ​ បាន​ធ្វើ​ការ​ឃាត់​ខ្លួន​ជន​ចំណាក​ស្រុក​ប្រមាណ​៤៨នាក់​នេះ​ នៅ​ក្នុង​ទឹក​ដី​ថៃ​ ដែល​ស្ថិត​ក្នុង​ភូមិ​ផាកាត​ ឃុំ​ខ្លង​យ៉ៃ​ ស្រុក​ពោង​ណាំ​រ៉ន​ ខេត្ត​ចន្ទ័​បូរី​ប្រទេស​ថៃ ដែល​ជាប់​និង​ភូមិ​ផ្សា​ព្រំ​ ឃុំ​ស្ទឹង​កាច់​ ស្រុក​សា​លា​ក្រៅ​ ខេត្ត​ប៉ៃ​លិន​។​ លោក​ថា​ ក្រោយ​ពី​ប្រមូល​បាន​ពលករ​ទាំង​អស់​នោះ​រួច​មក​ យើង​បាន​ធ្វើការ​ណែ​នាំ​អប់រំ​ឲ្យ​ពួក​គេ​ត្រឡប់​ទៅ​ផ្ទះ​វិញ​ ព្រម​ទាំង​ ធ្វើការ​តាម​ដាន​ដំណើរ​នៃ​ការ​វិល​ប្រឡប់​របស់​ពួក​គេ​ផង​ដែរ​»​។​
      លោក​អេង​ ភាវ​ នាយក​រិយាល័យ​ប្រឆាំង​បទ​ល្មើស​ជួញ​ដូរ​មនុស្ស​និង​ការពារ​អនិតិជន​ខេត្ត​ ប៉ៃ​លិន​បាន​មាន​ប្រសាសន៍​ថា​ សមត្ថកិច្ច​កំពុង​ធ្វើការ​ស្រាវ​ជ្រាវ​ ដើម្បី​តាម​ចាប់​ខ្លួន​ក្រុម​មេ​ខ្យល់​នៅ​ប្រទេស​កម្ពុជា​។​លោក​បន្ត​ថា​ ជន​ចំណាក​ស្រុក​ទាំង​នោះ​បាន​ធ្វើ​ដំណើរ​មក​ពី​ខេត្ត​កំពង់​ចាម​ កំពង់​ធំ​ ភ្នំពេញ​ ស្វាយ​រៀង​ ព្រៃវែង​ បន្ទាយ​មាន​ជ័យ​ តាកែវ​ និង​សៀម​រាប​ ដោយ​ពួក​គេ​មក​ប្រមូល​ផ្តុំ​គ្នា​នៅ​តំបន់​ខាង​លើ ដើម្បី​រង់​ចាំ​មេ​ខ្យល់​ជា​ជន​ជាតិ​ថៃ​ មក​នាំ​ពួក​គេ​ទៅ​ធ្វើ​ជា​កម្មករ​រោង​ចក្រ​មួយ​កន្លែង​ក្នុង​ប្រទេស​ថៃ​។​ លោក​ថ្លែង​ថា​៖«​ពលករ​ខ្មែរ​អាច​ប្រមូល​ផ្តុំ​គ្នា​នៅ​ទីនេះ​បាន​ ដោយ​សារ​តែ​មេក្លោង​ធំ​របស់​មេ​ខ្យល់​បាន​រាយ​បណ្តាញ​របស់​ខ្លួន​នៅ​គ្រប់​ ខេត្ត​ទាំង​អស់​ក្នុង​ប្រទេស​កម្ពុជា​ ម្យ៉ាង​ទៀត​ពួកគេ​អាច​ឈាន​ចូល​ទឹក​ដី​ថៃ​បាន​ ក៏​ដោយ​សារ​ភាព​ពុក​រលួយ​របស់​មេ​ខ្យល់​នៅ​ប្រទេស​ថៃ​ដែរ​»​។​ លោក​ថ្លែង​ថា​៖«​ដើម្បី​ទប់​ស្កាត់​នូវ​បញ្ហា​នេះ​ ខាង​ថ្នាក់​លើ​បាន​ដាក់​បញ្ជារ​ឲ្យ​យើង​បង្កើន​ការ​ដើរ​ល្បាត​ជា​ប្រចាំ​ ទី​២​ត្រូវ​ធ្វើ​ការ​សហការ​និង​ប្រមូល​ពត៌​មាន​បន្ថែម​ពី​សមត្ថកិច្ច​ថៃ​ និង​ធ្វើការ​ដាក់​កំលាំង​សំងាត់​នៅ​តាម​គោល​ដៅ​ផង​ដែរ​»​។​
     ទាក់​ទង​និង​បញ្ហា​នេះ​កាល​ពី​ថ្ងៃ​ទី​២៣​ ខែ​មិថុនា​ រដ្ឋាភិបាល​កម្ពុជា​បាន​បើក​កិច្ច​ពិភាក្សា​ ថ្នាក់​ជាតិ​មួយ​ ដែល​មាន​រយៈ​ពេល​២ថ្ងៃ​ ដើម្បី​ស្វែង​រក​វិធានការណ៍​បង្កា​ទប់​ស្កាត់​លើ​ករណី​ជួញ​ដូរ ​
មនុស្ស​។​





អនុក្រិត្យថ្មីរបស់ក្រសួងធម្មការនិងតំរូវទៅតាមស្ថានភាពជាក់ស្តែង


ដោយៈ ឃួន​ លក្ខិណា​

ថ្ងៃទី២៦ ខែមិថុនា ឆ្នាំ២០១១
ភ្នំពេញ៖ ក្រសួង​ធម្មការ​និង​សាសនា​បាន​រៀប​ចំ​សេចក្តី​ព្រាង​អនុក្រឹត្យ​ស្តី​ពី​ការ​រៀប​ចំ​ និង​ការ​ប្រព្រឹត្ត​ទៅ​របស់​ក្រសួង​ធម្មការ​និង​សាសនា​ ដើម្បី​តំរូវ​ទៅ​តាម​ស្ថាន​ភាព​ការ​ងារ​នា​ពេល​បច្ចុប្បន្ន​។​
           លោក​ឈន​ អៀម​រដ្ឋ​លេខាធិការ​ក្រសួង​ធម្មការ​និង​សាសនា​បាន​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​អាទិត្យ​ថា​ ដោយ​មាន​ការ​ចូល​រួម​ពី​ក្រសួង​អប់​រំ​ និង​គណៈ​សង្ឈ​នាយក​ដឹក​នាំ​សម្តេច​ព្រះ​មហា​សុ​មេធាធិបតី​ នន្ទ​ង៉ែត​ ក្រសួង​ធម្ម​ការ​និង​ សាសនា​ បាន​រៀបចំ​សេចក្តី​ព្រាង​អនុក្រឹត្យ​នេះ​ឡើង​ ដើម្បី​ឲ្យ​សម​ស្រប​ទៅ​តាម​តួនាទី​ភារកិច្ច​ និង​តម្រូវ​ការ​ការ​ងារ​ក្នុង​ក្រសួង​ធម្មការ​និង​សាសនា​ ដែល​កាន់​តែ​មាន​ការ​រីក​ចម្រើន​ធំ​ឡើង​ ពិសេស​ការ​ងារ​ពាក់​ពន្ធ័​និង​ពុទ្ធិក​សិក្សា​ជាតិ​។​ លោក​បន្ត​ថា​ សេច​ក្តី​ព្រាង​អនុក្រឹត្យ​នេះ​ត្រូវ​បាន​រៀប​ចំ​ជា​ច្រើន​ខែ​មក​ហើយ​ ដោយ​វា​ត្រូវ​បាន​ដក​ចេញ​ពី​អនុក្រឹត្យ​ចាស់​លេខ​១៣​ ដែល​បាន​អនុម័ត​កាល​ពី​អាណត្តិទី​១​នៃ​រដ្ឋ​សភា​មក​ម្លេះ​។​ លោក​ថ្លែង​ថា​៖« ​ការ​រៀប​ចំ​សេច​ក្តី​ព្រាង​អនុក្រឹត្យ​នេះ​គឺ​សំខាន់​ណាស់​ ដើម្បី​ធ្វើការ​គ្រប់​គ្រង​អំពី​ តួនាទី​របស់​មន្ត្រី​ធម្មការ​និង​សាសនា។ ​លោក​ថា​៖«​ពី​មុន​មក​ពាក់​ពន្ធ័​និង​ផ្នែក​ពុទ្ធិក​សិក្សា​ជាតិ​ ក្រសួង​មានភាព​ងាយ​ស្រួល​ក្នុង​ការ​គ្រប់​គ្រងលើការងារនេះ​ ដោយ​សារ​តែ​មាន​សកល​វិទ្យាល័យ​សិក្សា​ធម៌​វិន័យ​មាន​ត្រឹម​តែ​មួយ​ រឺ​ ពីរ​ប៉ុណ្ណោះ​ ប៉ុន្តែ​មក​ដល់​បច្ចុប្បន្ន​នេះ​ សកលវិទ្យាល័យ​ទាំង​នោះ​ត្រូវ​បាន​ពង្រីក​សាខា​ស្ទើរ​គ្រប់​ទីកន្លែង​ ដូច្នេះ​វា​មាន​ផល​លំបាក​ច្រើន​​ក្នុង​ការ​គ្រប់​គ្រង ​ដោយ​សារ​តែ​ច្បាប់​ចាស់​វា​មិន​បាន​តំរូវ​ទៅ​តាម​ស្ថាន​ភាព​ដែល​កំពុង​អនុវត្ត​ជាក់​ស្តែងនាពេលនេះ​ ដូច្នេះ​ទើប​ក្រសួង​ធម្មការ​និង​សាសនា​បាន​ស្នើ​ឲ្យ​មាន​ការ​បង្កើត​អនុក្រឹត្យ​ថ្មី​នេះ​ឡើង​។​»
យោង​តាម​សេចក្តី​ប្រកាស​ព័ត៌​មាន​របស់​ក្រសួង​ធម្មការ​និង​សាសនា​ដែល​បាន​ចេញ​កាល​ពី​ថ្ងៃ​អាទិត្យ​នេះ​បាន​ឲ្យ​ដឹង​ថា​ សេចក្តី​ព្រាង​អនុក្រឹត្យ​ស្តី​ពី​ ការ​រៀបចំ​ និង​ការ​ប្រព្រឹត្ត​ទៅ​របស់​ក្រសួង​ធម្មការ​និង​សាសនា​មាន​១២​ជំពូក​ និង​៣៥​មាត្រា​ ដែល​មាន​វិសាល​ភាព​អនុវត្ត​លើ​វិស័យ​ធម្មការ​និង​សាសនា​នៅ​គ្រប់​អង្គ​ភាព​ថ្នាក់​កណ្តាល​ ថ្នាក់​រាជធានី​ ខេត្ត​/​ក្រុង​ ខណ្ឌ័​ និង​គ្រឹះ​ស្ថាន​ពុទ្ធិក​សិក្សា​។​

ជម្លោះរវាងសង់នៅវត្តក្រុងសួងត្រូវបានបញ្ជប់

ដោយៈ ឃួន​ លកិ្ខណា​

ថ្ងៃទី២៦ ខែមិថុនា ឆ្នាំ២០១១
កំពង់​ចាម​៖ ​សមត្ថ​កិច្ច​ក្រុង​សួង​ ខេត្ត​កំពង់​ចាម​ កាល​ពី​ថ្ងៃ​អាទិត្យ​នេះ​ បាន​ធ្វើការ​ដោះ​លែង​លោក​នេន​មួយ​អង្គ​ ព្រះ​ជន្ម​១៦​ឆ្នាំ​ ដែល​ជាប់​ពាក់​ពន្ធ័​និង​បទ​បង្ក​របួស​ស្នាម​ លើ​ពិក្ខុ​ម្នាក់​ជា​គ្រូ​សូត្រ​ស្តាំម​ ដែល​គង់​នៅ​ក្នុង​វត្ត​គីរី​វណ្ណ​រាម​ភ្នំ​ចន្ទ័​។​
            លោក​លាង​ អេង​ អធិការ​ក្រុង​សួង​បាន​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​អាទិត្យ​ថា​ មូល​ហេតុ​ដែល​លោក​ធ្វើការ​ដោះ​លែង​លោក​នេន​មួយ​អង្គ​នេះ​ ក៏​ព្រោះ​តែ​ខាង​ពិក្ខុ​ជា​ជន​រង​គ្រោះ​បាន​ស្នើ​ឲ្យ​លោក​ធ្វើការ​បញ្ចប់​នូវ​ករណី​នេះ​។​ លោក​បន្ត​ថា​ ពិក្ខុ​រង​គ្រោះ​និង​លោក​នេន​មួយ​អង្គ​នេះ​គឺ​ត្រូវ​ជាប់​សាច់​ឈាម​ជា​បង​ប្អូន​និង​គ្នា​ ដូច្នេះ​យោង​តាម​ការ​សម្រប​សម្រួល​ទាំង​សង​ខាង​ លោក​បាន​សម្រេច​បញ្ចប់​សុំនុំ​រឿង​ត្រឹម​ហ្នឹង​។​ លោក​ថ្លែង​ថា​៖«​យើង​មិន​បន្ត​រឿង​នេះ​ទៀត​ទេ​ ដោយ​សារ​តែ​ភាគី​ខាង​ជន​រង​គ្រោះ​មិន​បាន​ដាក់​ពាក្យ​ប្តឹង​ ម៉្យាង​ទៀត​បើ​តាម​ការ​ស៊ើប​អង្កេត​របស់​យើង​បាន​រក​ឃើញ​ថា ករណី​បង្ក​របួស​ស្នាម​នេះ​ ពិក្ខុ​រង​គ្រោះ​ជា​អ្នក​បង្ក​ហេតុ​នេះ​ឡើង​»​។​
            នៅ​វេលា​ម៉ោង​ប្រមាណ​៥​រសៀល​ថ្ងៃទី​២៤​ ខែ​មិថុនា​ ឆ្នាំ​២០១១​ សមត្ថ​កិច្ច​ក្រុង​សួង​ បាន​ធ្វើ​ការ​ឃាត់​ខ្លួន​លោក​នេន​មួយ​អង្គ​ដែល​មាន​ឈ្មោះ​ឆេង​ សុខ​គាន​ អាយុ​១៦​ឆ្នាំ​គង់​នៅ​ក្នុង​វត្ត​គីរី​វណ្ណ​រាម​ភ្នំ​ចន្ទ័​ ដែល​ស្ថិត​នៅ​សង្កាត់​វិហារ​លួង​ ក្រុង​សួង​ ខេត្ត​កំពង់​ចាម​ ដោយ​លោក​នេន​មួយ​អង្គ​នេះ​បាន​ជាប់​ពាក់​ពន្ធ័​និង​ករណី​បង្ក​របួស​ស្នាម​ ក្នុង​ការ​យក​កាំបិត​គុប​មក​លើ​ពិក្ខុ​មួយ​អង្គ​ដែល​មាន​ឈ្មោះ​ប៉ែន​ ប៊ុន​លី​ អាយុ​២៧​ឆ្នាំ​ ជា​គ្រូ​សូត្រ​ស្តាំម​រស់​នៅ​ក្នុង​ទីតាំង​ជាមួយ​គ្នា​។​
            ប្រភព​ពី​លោក​នេន​មួយ​អង្គ​ឈ្មោះ​កង​ ទី​ អាយុ​១៧ឆ្នាំ​ ជា​អ្នក​ឃើញ​ហេតុការណ៏​នេះ​ផ្ទាល់​បាន​ឲ្យ​ដឹង​ថា​ នៅ​វេលា​ម៉ោង​ប្រមាណ​១​និង​៣០​នាទី​ លោក​នេន​ឆេង​ សុខ​គាន​ បាន​ប្រព្រឹត្ត​ខុស​និង​វិន័យ​សង្ឈ​ ក្នុង​ការ​ឡើង​លើ​វិហារ​លេង​គុប​វង់​ជាមួយ​និង​ក្មេង​ៗ​រស់​នៅ​ក្បែរ​ភូមិ​ បន្ទាប់​មក​លោក​ពិក្ខុ​ប៉ែន​ ប៊ុន​លី​ បាន​ធ្វើការ​ស្តី​ប្រដៅ​និង​ប្រើ​ហឹង្សា​បន្តិច​បន្តួច​មក​លើ​លោក​នេន​ឆេង​ សុខ​គាន​ បណ្តាល​ឲ្យ​លោក​នេន​ មាន​ចិត្ត​ខឹង​យ៉ាង​ខ្លាំង​។​ លោក​នេន​កង​ ទី​បាន​បន្ត​ថា​ ក្រោយ​ពី​ការ​ស្តី​ប្រដៅ​រួច​មក ទាំង​ពីរ​អង្គ​ក៏​បាន​ដើរ​សំដៅ​មក​គុដ​ទាំង​អស់​គ្នា​ ក្រោយ​មក​លោក​នេន​ សុខ​គាន​ បាន​ឡើង​លើ​កុដ​រួច​យក​កាំបិត​ចាក់​ករ​ជ្រូក​គុប​មក​ចំ​ព្រះ​ពិក្ខុ​ប៊ុន​ លី​បណ្តាល​ឲ្យ​ត្រូវ​របួស​ធ្ងន់​ត្រង់​ពោះ​ខាង​ធ្វេង​លេច​ចេញ​ពោះ​វៀន​មក​ក្រៅ​។​
            បើ​តាម​ពុទ្ធដីការ​របស់​លោក​នេន​រស់​ វណ្ណៈ​ អាយុ​១៦ឆ្នាំ​ ជា​អ្នក​មើល​ថែ​រក្សា​លោក​ពិក្ខុ​ប៉ែន​ ប៊ុន​លី​បាន​ឲ្យ​ដឹង​ថា​ បន្ទាប់​ពី​ត្រូវ​របួស​រួច​មក​នៅ​វេលា​ម៉ោង​ប្រមាណ​៣​និង​៣០​នាទី​ ព្រះ​សង្ឈ​គង់​នៅ​ក្នុង​វត្ត​ទាំង​អស់​បាន​ធ្វើការ​ជួយ​សង្រ្គោះ​ពិក្ខុ​ប៊ុន​ លី​ ដោយ​ដឹក​លោក​មក​កាន់​មន្ទីរ​ពេទ្យ​ខេត្ត​កំពង់​ចាម​។​ ​លោក​នេន​ វណ្ណៈ​បាន​បន្ត​ថា​ ស្ថាន​ភាព​លោក​ពិក្ខុ​ប៊ុន​លី​មក​ដល់​ពេល​នេះ​នៅ​តែ​ធ្ងន់​ ធ្ងរ​ដដែល​ ដោយ​លោក​ចេះ​តែ​ក្អួត​ និង​ឈឺ​ចុក​នៅ​ត្រង់​របួស​ចាស់​ ហើយ​មិន​អាច​កំរើក​បាន​។​ លោក​នេន​វណ្ណៈ​ បាន​មាន​ពុទ្ធដីការ​បញ្ជាក់​ថា​៖«​លោក​ប៊ុន​ លី​បាន​ប្រាប់​អាត្មា​ថា​ ពី​មុន​រហូត​មក​ដល់​ឥឡូវ​នេះ​លោក​មិន​មាន​បំណង​ដាក់​ពាក្យ​ប្តឹង​លោក​នេន​ សុខ​គាន​ទេ​ ប៉ុន្តែ​ខាង​ប៉ូលីស​បាន​ឃាត់​ខ្លួន​លោក​នេន​សុខ​ គាន​ គឺ​ដើម្បី​ទាម​ទារ​លុយ​ចំនួន​២០០​ដុល្លា​ ជា​ថ្លៃ​លួស​ខ្លួន​ចេញ​ពី​មន្ទីរ​ឃុំ​ឃាំង​។
            ពាក់​ពន្ធ័​និង​លុយ​ចំនួន​២០០​ដុល្លា​នេះ​ លោក​លាង​ អេង​អធិការ​ក្រុង​សួង​បាន​ឆ្លើយ​បំភ្លឺ​ថា​ លុយ​ចំនួន​២០០​ដុល្លា​នេះ​ លោក​បាន​ធ្វើការ​សម្រប​សម្រួល​ ដើម្បី​ប្រគល់​ឲ្យ​ជន​រង​គ្រោះ​សម្រាប់​ថ្លៃ​ចំណាយ​វះ​កាត់​។​ លោក​និយាយ​ថា​៖«​ខ្ញុំ​មិន​បាន​ទទួល​ផល​ប្រយោជន៍​មួយ​កាក់​មួយ​សេន​ឡើយ​
ក្នុង​រឿង​នេះ​»​។​
           
           
           
           
           
           
           


Thursday, June 23, 2011

រដ្ឋាភិបាលកម្ពុជាបានរកឃើញភាពចន្លោះប្រហោងក្នុងការទប់ស្កាត់បទល្មើសជួញដូរមនុស្ស

ដោយៈ ឃួន​ លក្ខិណា​

ថ្ងៃទី២៣ ខែមិថុនា ឆ្នាំ ២០១១
ភ្នំពេញ​៖​ រដ្ឋាភិបាល​កម្ពុជា​ បាន​រក​ឃើញ​ភាព​ចន្លោះ​ប្រហោង​របស់​ក្រសួង​ពាក់​ពន្ធ័​ និង​អង្គការ​ក្រៅ​រដ្ឋាភិបាល​ ដែល​មិន​សូវ​មាន​កិច្ច​សហការ​ល្អ​ជាមួយ​គ្នា​ ក្នុង​ការ​ទប់​ស្កាត់​បទ​ល្មើស​ជួញ​ដូរ​មនុស្ស​ ដែល​ជា​ហេតុ​ធ្វើ​ឲ្យ​ករណី​នេះ​នៅ​មិន​ទាន់​ទទួល​បាន​ប្រសិទ្ធ​ភាព​ខ្ពស់​។​
            លោក​ឧបនាយក​រដ្ឋ​មន្រ្តី​ ស​ ខេង​ រដ្ឋមន្រ្តី​ក្រសួង​មហាផ្ទៃ​បាន​ថ្លែង​នៅ​ក្នុង​ពិធិ​បិទ​សិក្ខា​សា​លា​ នៅ​សណ្ឋាគារ​ហ៊ីម៉ាវ៉ារី​ កាល​ពី​ថ្ងៃ​ម្សិល​មិញ​ថា​ កន្លង​មក​នេះ​នៅ​ក្នុង​ការ​ងារ​ប្រយុទ្ធ​ប្រឆាំង​អំពើ​ជួញ​ដូរ​មនុស្ស​ ក្រសួង​ពាក់​ពន្ធ័​ និង​អង្គការ​សង្គម​ស៊ីវិល​ជាច្រើន​ បាន​ចូល​រួម​អនុវត្ត​ការ​ងារ​បង្ការ​ទប់​ស្កាត់​បទ​ល្មើស​នេះ​ ប៉ុន្តែ​មិន​សូវ​មាន​កិច្ច​សហការ​គ្នា​ល្អ​ ដើម្បី​ធានា​ថា​ សកម្មភាព​នោះ​មិន​ត្រួត​ជាន់​ គ្នា​ និង​មាន​ទិស​ដៅ​ជាក់​លាក់​តែ​មួយ​ដូច​គ្នា​ និង​មិន​មាន​ភាព​ខ្វះ​ចន្លោះ​នោះ​ឡើយ​ ដូច្នេះ​ការ​បើក​វេទិការ​ពិភាក្សា​គ្នា​ក្នុង​រយៈ​ពេល​២ថ្ងៃ​នេះ​ ពិត​ជា​នាំ​មក​នូវ​ពត៌​មាន​ មេរៀន​ បទ​ពិសោធន៍​ជា​គន្លឹះ​ ឈាន​ទៅ​ការ​រៀបចំ​យុទ្ធ​សាស្រ្ត​រួម​មួយ​ក្នុង​ការ​បង្ការ​ទប់​ស្កាត់​ដែល​ឆ្លើយ​តប​ទៅ​និង​ស្ថាន​ភាព​ និង​មាន​ការ​ចូល​រួម​យ៉ាង​ទូលំ​ទូលាយ​។​ លោក​ថ្លែង​ថា​៖«​ ការ​ធ្វើ​សកម្មភាព​រាយ​ប៉ាយ​ដោយ​មិន​មាន​គោល​ដៅ​ជា​យុទ្ធ​សាស្រ្ត​ និង​មិន​មាន​ការ​សម្រប​សម្រួល​ បាន​នាំ​ឲ្យ​មាន​ការ​ត្រួត​ជាន់​គ្នា​ ឬ​មាន​ចំណុច​សេស​សល់​ ដែល​មិន​បាន​យក​ចិត្ត​ទុក​ដាក់​ និង​មិន​មាន​ប្រសិទ្ធ​ភាព​ល្អ​ឡើយ​ ហើយ​ធ្វើ​ឲ្យ​ខាត​បង់​នូវ​ធន​ធាន​ដោយ​ឥត​ប្រយោជន៍​ថែម​ទៀត​»​។​ លោក​ថា​៖«​ដើម្បី​ផល​ប្រយោជន៍​របស់​ប្រជា​ ពលរដ្ឋ​ឲ្យ​រួច​ផុត​ពី​ការ​រង​គ្រោះ​ដោយ​អំពើ​ជួញ​ដូរ​មនុស្ស​ យើង​ទាំង​អស់​គ្នា​ដែល​មាន​ឆន្ទះ​ មាន​ សកម្ម​ភាព​និង​មាន​ធន​ធាន​អនុវត្ត​ គួរ​តែ​ពិនិត្យ​ពិភាក្សា​គ្នា​ រក​គន្លិះ​រួម​ ហើយ​អនុវត្ត​ទៅ​តាម​មុខ​សញ្ញា​រៀង​ៗ​ខ្លួន​ ដើម្បី​ធ្វើ​ឲ្យ​ប្រជាពលរដ្ឋ​ជៀស​ផុត​ពី​ភាព​រង​គ្រោះ​ និង​មាន​សុវត្ថិភាព​»​។​
យោង​តាម​របាយ​ការណ៏​គណៈ​កម្មាធិការ​ដឹក​នាំ​ ការ​បង្ក្រាប​អំពើ​ជួញ​ដូរ​មនុស្ស​ ការ​រត់​ពន្ធ​ ការ​ធ្វើ​អាជីវកម្ម​ពលកម្ម​លើ​មនុស្ស​ និង​អាជីវកម្ម​ផ្លូវ​ភេទ​ លើ​ស្រ្តី​និង​កុមារ​ ហៅ​កាត់​ថា​(ប.ជ.រ.ព.ភ)​ បាន​ឲ្យ​ដឹង​ថា​ ករណីបង្ក្រាបការជួញដូរមនុស្ស​នៅ​ក្នុង​រយៈ​ពេល​១២ខែ​ នៃ​ឆ្នាំ​២០១០​នេះ​ មាន​១៦០​ករណី​ ក្នុង​នោះ​មាន​ជន​រង​គ្រោះ​៦៨៦​នាក់​ និង​ឃាត់​ខ្លួន​ជន​សង្ស័យ​២៤២​នាក់​។​
           លោក​ស្រី​ជូរ​ ប៊ុន​អេង​រដ្ឋ​លេខាធិការ​ក្រសួង​មហាផ្ទៃបាន​មាន​ប្រសាសន៍​ថា​៖«​ឆ្លង​កាត់​តាម​រយៈ​កិច្ច​ប្រជុំ​ដែល​បាន​ធ្វើ​ឡើង​រវាង​មន្រ្តី​រដ្ឋាភិបាល​ និង​អង្គ​ការ​ដៃគូរ​ពាក់​ពន្ធ័​ អាច​ឲ្យ​យើង​ធ្វើ​ ការ​សរុប​លទ្ធ​ផល​ទៅ​តាម​ភាព​ជាក់​ស្តែង​ នៃ​ការ​ចុះ​អនុវត្ត​វិធានការណ៍​បង្ការ​ទប់​ស្កាត់​បទ​ល្មើស​ជួញ​​ដូរ​មនុស្ស»។ លោក​ស្រីបន្តថា អ្វីដែលជាភាពខ្វះចន្លោះត្រូវបានរកឃើញនៅក្នុងកិច្ចប្រជុំនេះ មាន​៣​ចំនុច​ដូច​ជា​ ទី១​ ភាព​ខ្វះ​ខាត​ព័ត៌​មាន​ជា​មូល​ដ្ឋាន​ក្នុង​ការ​តាម​ដាន​ និង​វាយ​តម្លៃ​ត្រួត​ពិនិត្យ​ ដើម្បី​ឲ្យ​មើល​ឃើញ​ពី​ប្រសិទ្ធ​ភាព​នៃ​វិធីសាស្រ្ត​ទាំង​នោះ​ ទី២​ ខ្វះ​កិច្ច​សហការ​ទូលំ​ទូលាយ​និង​តាម​មិន​ទាន់​ព្រិត្តិការណ៍​បច្ចុប្បន្ន​ភាព​ និង​មិន​បាន​ចុះ​ទៅ​តាម​គ្រប់​គោល​ដៅ​ ព្រម​ទាំង​ខ្វះ​ធន​ធាន​ថវិការ​ក្នុង​ការ​អនុវត្ត​ ព្រោះ​ថវិការ​ទាំង​នោះ​ត្រូវ​ពឹង​ផ្អែក​លើ​អង្គ​ការ​ដៃ​គូរ​។​ លោក​ស្រី​បញ្ជាក់​ថា​៖«​កិច្ច​ការ​ដែល​ត្រូវ​ធ្វើ​បន្ត​ទៅ​ទៀត​នេះ​ គឺ​ត្រូវ​ប្រមូល​កំលាំង​ទាំង​អស់​គ្នា​ ដើម្បី​ធ្វើការ​ផ្តល់​នូវ​អន្តរាគមន៍​ ក៍​ដូច​ជា​គំនិត​ទៅ​ប្រជាពលរដ្ឋ​ឲ្យ​ចំ​គោល​ដៅ​តាម​អ្វី​ដែល​ពួក​គេ​កំពុង​ត្រូវ​ការ​»​។​

            ​



             
           
           



Wednesday, June 22, 2011

ពិរុទ្ធជនម្នាក់ត្រូវបានស្លាប់ដោយសារជំងឺប្រចាំកាយ

ដោយៈ ឃួន​ លក្ខិណា​

ថ្ងៃទី២២ ខែមិថុនា ឆ្នាំ២០១១
បន្ទាយ​មាន​ជ័យ​៖ ​យោង​តាម​ការ​ធ្វើ​កោសល្យ​វិច្ឆ័យ​របស់​សមត្ថកិច្ច​ក្រុង​សិរីសោភណ័​ ខេត្ត​បន្ទាយ​មាន​ជ័យ​កាល​ពី​ថ្ងៃ​ ២១​ ខែ​មិថុនា​បាន​ឲ្យ​ដឹង​ថា​ ពិរុទ្ធ​ជន​ម្នាក់​ឈ្មោះ​អ៊ុំ​ វុទ្ធី​ ភេទ​ប្រុស​ អាយុ​៤៣​ឆ្នាំ​ បាន​ជាប់​ចោទ​ពី​បទ​នាំ​មនុស្ស​ឆ្លង​ដែន​ដោយ​ខុស​ច្បាប់​ ត្រូវ​បាន​ស្លាប់​បាត់​បង់​ជីវិត​ នៅ​វេលា​ម៉ោង​១​ និង​៤៥​នាទី​ថ្ងៃ​ត្រង់​ ដោយ​សារ​ជំងឺ​ប្រចាំ​កាយ​។​
            ប្រភព​ពី​មន្ត្រី​ពន្ធនាគារ​ខេត្ត​បន្ទាយ​មាន​ជ័យ​បាន​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​ពុធ​ថា​ ពិរុទ្ធ​ជន​រូប​នោះ​ ត្រូវ​បាន​ដាច់​ខ្យល់​ស្លាប់​នៅ​ក្នុង​មន្ទីរ​ពេទ្យ​ បន្ទាប់​ពី​ក្រុម​គ្រូ​ពេទ្យ​បាន​ព្យាយាម​ធ្វើការ​ជួយ​ស​ង្រ្គោះ​ភ្លាម​ៗ​នោះ​។​ ប្រភព​ដដែល​បាន​អះ​អាង​ថា​ មុន​ពេល​ចាប់​ខ្លួន​ ពិរុទ្ធ​រូប​នេះ​មាន​ទី​លំ​នៅ​ភូមិ​ ក្បាល​ស្ពាន​ ក្រុង​ប៉ោយ​ប៉ែត​ ខេត្ត​បន្ទាយ​មាន​ជ័យ​។​ ការ​ចាប់​ខ្លួន​បុរស​រូប​នេះ​ត្រូវ​បាន​ធ្វើ​ឡើង​ដោយ​ ផ្អែក​ទៅ​តាម​ដីកា​ឃុំ​ខ្លួន​របស់​តុលាការ​ កាល​ពី​ថ្ងៃទី​០៣​ ខែ​មិនា​ ឆ្នាំ​២០០៨​។​ ប្រភព​ដដែល​បាន​បញ្ជាក់​ថា​៖«​ពិរុទ្ធ​ជន​រូប​នេះ​ ទើប​តែ​ចូល​រស់​នៅ​ក្នុង​ពន្ធនាគារ​ បាន​ប្រហែល​តែ​៤​ទៅ​៥ថ្ងៃ​ប៉ុណ្ណោះ ​ក្រោយ​មក​រូប​គេ​ក៏​កើត​មាន​អាការៈ​ជំងឺ​លើស​ឈាម​យ៉ាង​ធ្ងន់ធ្ងរ​ ដែល​មិន​អាច​ជួយ​សង្រ្គោះ​បាន​ ទើប​បណ្តាល​ឲ្យ​ស្លាប់​បាត់​បង់​ជីវិត​ទៅ​»​។​
            លោក​វរៈ​សេនីយ៍​ទោ​ជៀប​ ចំរើន​ នាយ​ការិយា​ល័យ​បច្ចេក​ទេស​វិទ្យា​សាស្រ្ត​នៃ​ស្នងការ​ដ្ឋាន​ នគរបាល​ខេត្ត​មាន​ប្រសាសន៍​ថា​ បន្ទាប់​ពី​បាន​ទទួល​ព័ត៌​មាន​ថា​ មាន​ពិរុទ្ធ​ជន​ម្នាក់​ស្លាប់​នៅ​ក្នុង​ មន្ទីរ​ពេទ្យ​ លោក​បាន​ដឹក​នាំ​កំលាំង​ចុះ​ទៅ​ធ្វើ​កោសល្យ​វិច្ឆ័យ​សាក​សព​។​ លោក​ថ្លែង​ថា​៖«​បើ​តាម​ ការ​ពិនិត្យ​បាន​រក​ឃើញ​ថា​ ពិរុទ្ធជន​នោះ​ពិត​ជា​បាន​ស្លាប់​ដោយ​សារ​ជំងឺ​រំារ៉ៃ​រើ​ឡើង​ពិត​ប្រាកដ​មែន​ ព្រោះ​រូប​គេ​បាន​ដាច់​សរ​សៃ​ឈាម​នៅ​ក្នុង​ខួរ​ក្បាល​»​។​ លោក​ថា​បច្ចុប្បន្ន​ សាក​សព​ត្រូវ​បាន​តំ​កល់​ទុក​នៅ​វត្ត​សមាធិ​ផល​ក្នុង​ក្រុង​សិរីសោភណ័​ ដើម្បី​រង់​ចាំ​ក្រុម​គ្រួសារ​មក​ធ្វើ​បុណ្យ​តាម​ប្រពៃណី​។​
             






រដ្ឋាភិបាលប្រទេសកម្ពុជាកំពុងស្វែងរកវិធានការបង្កាទប់ស្កាត់អំពើជួញដូរមនុស្ស

ដោយៈ ឃួន​ លក្ខិណា​

ថ្ងៃទី២២ ខែមិថុនា ឆ្នាំ២០១១

ភ្នំពេញ​៖​ មន្ត្រី​រដ្ឋាភិបាល​កម្ពុជា​បាន​ថ្លែង​ឲ្យ​ដឹង​កាល​ពី​ព្រឹក​ម្សិល​មិញ​ថា​ អាជ្ញាធរ​នៃ​ប្រទេស​កម្ពុជា​កំពុង​ខិត​ខំស្វែង​រក​វិធានការណ៍​គ្រប់​គ្រង​ពលករ​ចំណាក​ស្រុក​ខុស​ច្បាប់​ឲ្យ​បាន​សម​ស្រប​ ដើម្បី​ត្រៀម​បង្កា​ទប់​ស្កាត់​លើ​ករណី​ជួញ​ដូរ​មនុស្ស​។​
លោក​ស្រី​ជូរ​ ប៊ុន​អេង​រដ្ឋលេខាធិការ​ក្រសួង​មហាផ្ទៃ​បាន​ប្រាប់​ភ្នំពេញ​ប៉ុស្តិ៍​ក្នុង​កិច្ច​ពិភាក្សា​ ​ថ្នាក់​ជាតិ​ នៅ​សណ្ឋាគារ​ហីម៉ាវ៉ាវី​ កាល​ពី​ព្រឹក​ម្សិល​មិញ​ថា​ ក្រសួង​មហា​ផ្ទៃ​បាន​រៀបចំ​កិច្ច​ពិភាក្សា​ថ្នាក់​ជាតិ​មួយ​ជា​ទ្រង់​ទ្រាយ​ធំ​ ដើម្បី​ឲ្យ​ក្រុម​លេខាធិការ​ដ្ឋាន​ នៃ​គណៈ​កម្មាធិការ​ជាតិ​ដឹក​នាំ​ការ​បង្រ្កាប​អំពើ​ជួញ​ដូរ​ ការ​រត់​ពន្ធ​ ការ​ធ្វើ​អាជីវកម្ម​ពល​កម្ម​លើ​មនុស្ស​ និង​ការ​ជួញ​ដូរ​ផ្លូវ​ភេទ​ស្រ្តី ​និង​កុមារ​ (ប.ជ.រ.ព.ភ) ​បាន​ចូល​រួម​យោលបល់​និង​បញ្ចេញ​មតិ​ឲ្យ​បាន​គ្រប់​ៗ​គ្នា​ ក្នុង​ការ​ស្វែង​រក​វិធាន​ការ​គ្រប់​គ្រង​ពលករ​ចំណាក​ស្រុក​ឲ្យ​បាន​សម​ស្រប​ ដើម្បី​ប្រយោជន៍​បង្កា​ទប់​ស្កាត់​លើ​អំពើ​ជួញ​ដូរ​មនុស្ស​។លោក​ស្រី​បន្ត​ថា​ កិច្ច​ពិភាក្សា​ថ្ងៃ​នេះ​ និង​ត្រូវ​លើក​ឡើង​នូវ​កត្តា​បី​ចំនុច​ ដើម្បី​យក​មក​ជជែក​គ្នា​​ ដែលមាន កត្តា​ផ្សព្វ​ផ្សាយ​តាម​គ្រប់​រូប​ភាព​ កត្តា​ផ្តល់​ជំរើស​នៅ​ក្នុង​ការ​រស់​នៅ​របស់​ប្រជាពល​រដ្ឋ​ និង​ជំរើស​នៅ​ក្នុង​ការ​សម្រេច​ចិត្ត​  ព្រម​ទាំង​កត្តា​ពាក់​ពន្ធ័​និង​ច្បាប់​គោល​នយោបាយ​។​ អ្នក​ស្រី​ថ្លែង​ថា​៖«​ យើង​ដឹង​ថា​ ប្រជាពលរដ្ឋ​អាច​សម្រេច​ចិត្ត​ចំណាក​ស្រុក​ទៅ​ប្រទេស​ក្រៅ​បាន​ ក៏​​ដោយ​សារ​កត្តា​ជម្រុញ​ និង​កត្តា​អូស​ទាញ​»​។​
ឆ្លើយ​តប​និង​បញ្ហា​នេះ​ កន្លង​មក​ស្នង​ការ​នគរបាល​រាជ​ធានី​-​ខេត្ត​ បាន​អនុវត្ត​ការ​ធ្វើ​សម្រង់​ស្ថិតិ​ពលករ​ចំណាក​ស្រុក​ ដើម្បី​ទៅ​រក​ការ​ងារ​ធ្វើ​នៅ​ក្រៅ​ប្រទេស​ ក្នុង​នោះ​គេ​បាន​រក​ឃើញ​ពលករ​ចំនួន​៩៥,១០៦​នាក់​ (​ស្រី​៣៧,០៩៨​នាក់​)​ បាន​ធ្វើ​ចំណាក​ស្រុក​ដោយ​ខុស​ច្បាប់​ ដោយ​មាន​មេ​ខ្យល់​១៣១​នាក់​ជា​អ្នក​អូស​ទាញ​។​ ដោយ​ឡែក​ស្នង​ការ​ដ្ឋាន​នគរបាល​ខេត្ត​បន្ទាយ​មាន​ជ័យ​ និង​កំពង់ធំ​ បាន​ធ្វើការ​ល្បាត​ទប់​ស្កាត់​ពលករ​ខ្មែរ​ចំណាក​ស្រុក​ ទៅ​ប្រទេស​ថៃ​ដោយ​ខុស​ច្បាប់​មាន​ចំនួន​៦២​៩​នាក់​ ព្រម​ទាំង​បាន​ណែនាំ​ឲ្យ​ត្រឡប់​ទៅ​ផ្ទះ​វិញ​។​
អ្នក​ស្រី​ជូរ​ ប៊ុន​អេង​បញ្ជាក់​ថា​៖«​បន្ទាប់​ពី​កិច្ច​ប្រជុំ​នេះ​ទៅ​ យើង​និង​ធ្វើការ​ពិនិត្យ​ឡើង​វិញ​ នូវ​ ព័ត៌​មាន​និង​លទ្ធ​ផល​ដែល​ទទួល​បាន​ថ្ងៃ​នេះ​ ដើម្បី​រៀបចំ​ឲ្យ​ចេញ​ជា​យុទ្ធ​សាស្រ្ត​យូរ​អង្វែង​នៅ​ក្នុង​ការ​បង្កា​ទប់​ស្កាត់​អំពើ​ជួញ​ដូរ​មនុស្ស​ ព្រម​ទាំង​ធ្វើការ​វាយ​តម្លៃ​ជា​ប្រចាំ​ ដើម្បី​ឲ្យ​ការ​អនុវត្ត​បាន​ទទួល​ប្រសិទ្ធ​ភាព​ខ្ពស់​»​។​
យោង​តាម​របាយ​ការណ៍​របស់​គណៈ​កម្មាធិការ​ជាតិ​ (ប.ជ.រ.ព.ភ) ​បាន​ឲ្យ​ដឹង​ថា​ សា​លា​ដំបូង​និង​អយ្យការ​រាជ​ធានី​-​ខេត្ត​បាន​ទទួល​និង​ចាត់​ការ​រឿង​ក្តី​ពាក់​ពន្ធ័​និង​ករណី​បទ​ល្មើស​ស្តី​ពី​ការ​ បង្រ្កាប​អំពើ​ជួញ​ដូរ​មនុស្ស​និង​អំពើ​ធ្វើ​អាជីវកម្ម​ផ្លូវ​ភេទ​មាន​ដូច​ជា​ នៅ​ក្នុង​រយៈ​ពេល​១២​ខែ​នៃ​ឆ្នាំ​២០១០​ មាន​ករណី​សរុប​ចំនួន​១៦៣​ករណី​ ជន​ល្មើស​២៤៩​នាក់​ ក្នុង​នោះ​មាន​ជន​សង្ស័យ​៦នាក់​ និង​ត្រូវ​លើក​លែង​ការ​ចោទ​ប្រកាន់​៦ករណី​ ព្រម​ទាំង​ធ្វើការ​ជំរុំជំរៈ​១៥៧​ករណី​ ក្នុង​នោះ​ជន​ជាប់​ចោទ​២៤៣នាក់​ និង​ផ្តន្ទា​ទោស​ឲ្យ​ជាប់​ពន្ធនាគារ​២១៥នាក់​ និង​រួច​ពី​បទ​ចោទ​ចំនួន​២៨នាក់​។​
លោក​អ៊ិត​ រ៉ាឌី​ រដ្ឋ​លេខាធិការ​ក្រសួង​យុត្តិធម៌​បាន​មាន​ប្រសាសន៍​ថា​ ការ​ធ្វើ​ចំណាក​ស្រុក​ ខុស​ច្បាប់​អាច​នាំ​ឲ្យ​ប្រជាពលរដ្ឋ​ចាញ់​បោក​គេ​និង​អាច​ក្លាយ​ទៅ​ជា​អំពើ​ជួញ​ដូរ​ក៏​មាន​ដែរ​  ដូច្នេះ​អ្វី​ដែល​គួរ​ធ្វើ​ក្នុង​ពេល​នេះ​គឺ​ការ​ចុះ​ពង្រឹង​ទៅ​កាន់​ថ្នាក់​មូល​ដ្ឋាន​ និងពង្រឹង​នៅ​តាម​ច្រក​ព្រំដែន​ផង​ ដែរ​។​ លោក​ថ្លែង​ថា​៖«​ប្រជាពលរដ្ឋ​ភាគ​ច្រើន​ដែល​ធ្វើ​ចំណាក​ស្រុក​និយម​ឆ្លង​ចូល​តាម​ច្រក​របៀង​ តូច​ៗ​ ដូច្នេះ​បើយើង​មាន​គោលការណ៍​ពង្រឹង​ច្រក​តូច​ៗ​ខុស​ច្បាប់​ឲ្យ​ក្លាយ​ទៅ​ជា​ច្រក​ស្រប​ច្បាប់​
នោះប្រជាពលរដ្ឋ​ខ្មែរ​ច្បាស់​ជា​មាន​សេរីភាព​ និង​ជៀស​ផុត​ពី​ក្តី​ព្រួយ​បារម្ភ​ជា​មិន​ខាន​»​។​