ដោយៈ ឃួន លក្ខិណា
ថ្ងៃទី៦ ខែមិថុនា ឆ្នាំ២០១១
បន្ទាយមានជ័យ៖ មន្ត្រីខេត្តបន្ទាយមានជ័យបានប្រាប់ភ្នំពេញប៉ុស្តិ៍ថា អាជ្ញាធរខេត្តនេះ បានបញ្ជាឲ្យលោកឧត្តមសេនីយ៍ត្រីភ្លន់ តារា ម្ចាស់អាជីវកម្មកាយភ្នំក្នុងសង្កាត់អូរអំបិល រៀបចំជួសជុលឡើងវិញនូវកំណាត់ផ្លូវមួយត្រង់ចំណុចឆ្ពោះទៅកាន់សាលាវិទ្យាល័យសម្តេចក្រុមព្រះ។
ការដ្ឋាននេះត្រូវបានធ្វើឡើងក្រោយពីមានសេចក្តីរាយការណ៏មួយពីប្រជាពលរដ្ឋជាច្រើនរយនាក់រស់នៅក្នុងភូមិអូរអំបិល សង្កាត់អូរអំបិល ក្រុងសិរីសោភណ្ឌ បានផ្ញើរទៅកាន់អាជ្ញាធរមូលដ្ឋានកាលពីថ្ងៃទី២ ខែមិថុនា ឆ្នាំ២០១១ ដោយផ្តោតលើការខូចខាតផ្លូវ ព្រោះតែរថយន្តអាជីវកម្មធុនធ្ងន់បានបើកបរឆ្លងកាត់ជារៀងរាល់ថ្ងៃ។
លោកស្តើង ស៊ីវហឺនាយករងវិទ្យាល័យសម្តេចក្រុមព្រះបានមានប្រសាសន៍ថា ផ្លូវនេះបាន កសាងក្រាលបេតុងតាំងពីឆ្នាំ២០០៩ ដោយតភ្ជាប់ពីវិទ្យាល័យសម្តេចក្រុមព្រះ ឆ្ពោះទៅតំបន់ភ្នំ។ លោកបន្តថា កាលពីពាក់កណ្តាលឆ្នាំ២០១០ បញ្ហានេះបានកើតមានម្តងរួចមកហើយ ប៉ុន្តែវាបានស្ងប់ស្ងាត់ទៅវិញ បន្ទាប់ពីមានអន្តរាគមន៍។ ប៉ុន្តែឥឡូវ បញ្ហានេះបានកើតឡើងម្តងទៀត ដូច្នេះពលរដ្ឋគ្រាន់តែស្នើសុំឲ្យអាជ្ញាធរធ្វើការបញ្ឈប់ឡានដឹកដីមិនឲ្យបរកាត់តទៅទៀត ព្រមទាំងធ្វើការជួលជុលផ្លូវនេះឡើងវិញ ដើម្បីសម្រួលដល់ការធ្វើដំណើររបស់សិស្ស លោកគ្រូ-អ្នកគ្រូ និងប្រជាពលរដ្ឋរស់នៅទីនេះ។ លោកនិយាយថា៖«ខ្ញុំបានប្រាប់ទៅមន្ត្រីសាលាក្រុងជាច្រើនលើករួចមកហើយ ពីបញ្ហានេះ ប៉ុន្តែនៅតែមិនអាចហាមឃាត់រថយន្តធំៗបើកបរកាត់តទៅទៀតបាន»។
លោកមាន ចន្ថា អាយុ៤៥ឆ្នាំ ប្រជាពលរដ្ឋរស់នៅភូមិអូរអំបិល សង្កាត់អូរអំបិល ក្រុងសីរី សោភណ្ឌ័ ខេត្តបន្ទាយមានជ័យបានមានប្រសាសន៍ថា លោកមានការសប្បាយចិត្តយ៉ាងខ្លាំងនៅ ពេលដែលអាជ្ញាធរបានរៀបចំជួសជុលផ្លូវនេះឡើងវិញ ព្រោះដើម្បីជៀសផុតនូវករណីគ្រោះថ្នាក់ ផ្សេងៗចំពោះអ្នកដំណើរដូចជាប្រជាពលរដ្ឋ សិស្ស គ្រូជាដើម។ លោកថ្លែងថា៖«បើទោះបីជាមាន ការជួសជុលផ្លូវនេះឡើងវិញក៏ដោយ ប៉ុន្តែយើងមិនចង់ឲ្យរថយន្តធ្វើអាជីវកម្មធំៗ ធ្វើការបើកបរនៅលើផ្លូវមួយខ្សែរនេះតទៅទៀតទេ»។
លោកឧត្តមសេនីយ៍ឯក ភ្លន់តារា មេបញ្ជារការដ្ឋានតំបន់ប្រតិបត្តិការសឹងរងខេត្តបន្ទាយ មានជ័យនិងជាម្ចាស់ប្រកបអាជីវកម្មកាយភ្នំបានមានប្រសាសន៍ថា លោកបានចាប់ផ្តើមធ្វើការជួសជុលផ្លូវដែលបានខូចខាតទើបតែ២ទៅ៣ថ្ងៃមុននេះទេ ហើយលោកក៏មិនទាន់ដឹងច្បាស់ដែរថា ការខូចខាតនេះ ត្រូវចំណាយថវិការអស់ប៉ុន្មានដែរ។ លោកបញ្ជាក់ថា៖«ពាក់ពន្ធ័និងសំណូមពររបស់ ប្រជាពលរដ្ឋលើបញ្ហាមិនឲ្យមានឡានដឹកដីធំៗ បើកបរលើផ្លូវមួយខ្សែរនេះ ខ្ញុំមិនមានសិទ្ធ ក្នុងការ ហាមឃាត់ឡានធ្វើអាជីវកម្មទាំងនោះទេ ប៉ុន្តែអ្នកដែលអាចហាមឃាត់ឡានទាំងនោះបាន គឺមានតែមន្រ្តីនៃមន្ទីរសាធារណៈ និងការដឹកជញ្ជូនប៉ុណ្ណោះ ទើបមានសិទ្ធឃាត់ពួកគេបាន។
លោកគឹម សុវណ្ណ អនុប្រធានមន្ទីរសាធារណៈការនិងដឹកជញ្ជូនខេត្តបន្ទាយមានជ័យបាន មានប្រសាសន៍ថា ករណីនេះវាមិនជាប់ពាក់ពន្ធ័និងមន្ទីរសាធារណៈទេ ព្រោះមន្ទីរសាធារណៈការ បានគ្រប់គ្រងតែផ្លូវជាតិ និងផ្លូវខេត្តប៉ុណ្ណោះ ដោយឡែកផ្លូវក្នុងក្រុងលោកមិនបានដឹងឡើយ។ លោកថ្លែងថា៖«មានតែអភិបាលក្រុងទេ ដែលជាអ្នកសម្រេចលើការប្រើប្រាស់ផ្លូវមួយនេះ»។
លោកអ៊ុំ រាត្រីអភិបាលក្រុងសិរីសោភណ្ឌមិនបានធ្វើអត្ថាធិប្បាយទេ ព្រោះជាប់រវល់ប្រជុំ។
No comments:
Post a Comment