ថ្ងៃទី៣០ ខែឧសភា ឆ្នាំ២០១១
ភ្នំពេញៈ វិទ្យាស្ថានប៉ាស្ទ័រមកពី៦ប្រទេស និងដៃគូរអភិវឌ្ឍន៍បណ្តាញមន្ទីរពិសោធន៍ក្នុងប្រទេសចំនួន៤ទៀតបានមកជួបជុំគ្នានៅកម្ពុជា កាលពីថ្ងៃចន្ទ័នេះ ដើម្បីធ្វើការជម្រុញតាមដាន ការវិភាគ និងដោះស្រាយអំពីស្ថានភាពជំងឺឆ្លងរាលដាលនៅក្នុងតំបន់។
លោកម៉ម ប៊ុនហេងរដ្ឋមន្ត្រីក្រសួងសុខាភិបាល បានមានប្រសាសន៍នៅក្នុងពិធីបើកសិក្ខាសាលា នៅសណ្ឋាគារសាន់វេកាលពីថ្ងៃអាទិត្យថា កិច្ចប្រជុំនេះ ត្រូវបានផ្តោតយ៉ាងសំខាន់លើស្ថានភាពជំងឺឆ្លង និងជំងឺផ្លូវដង្ហើម ដែលទាំងអស់នេះ គឺជាមូលហេតុចំបងនៃការស្លាប់របស់កុមារក្រោមអាយុ៥ឆ្នាំ ក្នុងប្រទេសកំពុងអភិវឌ្ឍន៍។ លោកបន្តថា តាមរយៈឯកសាររបស់ធនាគារពិភពលោក ជំងឺផ្លូវដង្ហើមស្រួចស្រាវអាចជាមូលហេតុបង្កឲ្យកុមារចំនួន៣០ទៅ៥០ភាគរយ ត្រូវទៅពិគ្រោះជំងឺនៅមណ្ឌលសុខភាព។ លោកថ្លែងថា៖« តាមរយៈកិច្ចសហការនេះ អាចឲ្យយើងធ្វើការប្រយុទ្ធនិងការប្រឈមដែលជាឱកាសឲ្យកាត់បន្ថយផលប៉ះពាល់ ផ្នែកសេដ្ឋកិច្ច និងសង្គមបានយ៉ាងច្រើន»។
ដើម្បីជម្រុញការតាមដាន ការវិភាគ និងការដោះស្រាយស្ថានភាពឆ្លងរាលដាលនៅក្នុងតំបន់ វិទ្យាស្ថានប៉ាស្ទ័រចំនួន៦ និងដៃគូរអភិវឌ្ឍនូវបណ្តាញមន្ទីរពិសោធន៍ក្នុងប្រទេសចំនួន៤ទៀត រួមមានវិទ្យាស្ថានប៉ាស្ទ័រកម្ពុជា វិទ្យាស្ថានប៉ាស្ទ័រទីក្រុងហូរជីមិញ វិទ្យាស្ថានប៉ាស្ទ័រទីក្រុងណាត្រាំង វិទ្យាស្ថានប៉ាស្ទ័រស៊ាងហៃ វិទ្យាស្ថានជាតិអនាម័យ និងជំងឺរាតត្បាតមកពីទីក្រុងហាណូយ មជ្ឈមណ្ឌលជាតិនៃមន្ទីរពិសោធន៍ និងជំងឺរាតត្បាតរបស់ប្រទេសឡាវ បានបើកកិច្ចពិភាក្សារួមគ្នាក្នុងប្រទេសកម្ពុជាចំនួន៣ថ្ងៃ គិតចាប់ពីថ្ងៃទី២០-៣១ខែឧសភានេះ ដើម្បីស្វែងរកវិធានការណ៍ដ៍ជាក់ លាក់ ទៅនិងការព្រមានជាជំហានដំបូងអំពីការឆ្លងរាលដាលនៃជំងឺដង្ហើមឲ្យបានទាន់ពេលវេលា។
លោក Philippe BUCHY មន្ត្រីនៃវិទ្យាស្ថានប៉ាស្ទ័រកម្ពុជាបានមានប្រសាសន៏ថា កាលពីឆ្នាំ២០០៧ លោកបានចាប់ផ្តើមស្រាវជ្រាវជាលើកដំបូងនៅក្នុងមន្ទីរពេទ្យខេត្តតាកែវ និងកំពង់ចាម។ លោកថ្លែងថា៖« យើងបានរកឃើញថា ក្នុងចំនោមអ្នកជំងឺទូទៅចំនួន៤ពាន់នាក់ មានកុមារប្រមាណ៦០ភាគរយបានកើតជំងឺទាក់ទងនិងផ្លូវដង្ហើម ហើយកុមារមួយចំនួនទៀតមិនត្រូវបានទទួលសេវាព្យាបាលនៅមន្ទីរពេទ្យរដ្ឋឡើយ»។
លោកឈន ណារិទ្ធវេជ្ជបណ្ឌិតផ្នែកជំងឺផ្លូវដង្ហើមប្រចាំមន្ទីរពេទ្យកាល់ម៉ែតបានមានប្រសាសន៍ថា បើតាមការសន្និដ្ឋានរបស់លោក មានមូលហេតុមួយចំនួនដែលធ្វើឲ្យកុមារមិនអាចទៅទទួលសេវាព្យាបាលជំងឺផ្លូវដង្ហើមនៅមន្ទីរពេទ្យរដ្ឋបាន គឺទី១មន្ទីរពេទ្យបង្អែកនិងមណ្ឌលសុខភាព វាបានស្ថិតនៅឆ្ងាយពីផ្ទះរបស់ពួកគេខ្លាំងពេក ទី២អាណាព្យាបាលអត់បានយល់ដឹងពីអាការៈជំងឺ ទី៣ឪពុកម្តាយនិយមព្យាបាលកូនដោយខ្លួនឯង។ លោកថ្លែងថា៖«ឆ្លើយតបនិងបញ្ហានេះក្រសួងសុខាភិបាលបានរៀបចំយន្តការផ្សព្វផ្សាយរួចទៅហើយ តាមរយៈប្រពន្ធ័ផ្សព្វផ្សាយជាដើម នៅក្នុងប្រទេសដូច្នេះយើងនៅតែខិតខំជម្រុញយន្តការនេះបន្តទៀត ដើម្បីភាពប្រសើរឡើង»។
No comments:
Post a Comment