ខេត្តមណ្ឌលគីរីៈ សមត្ថកិច្ចខេត្តមណ្ឌលគីរី កាលពីថ្ងៃម្សិលមិញនេះ បានបញ្ជូនសុំនុំរឿងអ្នកកាសែត៣នាក់ទៅកាន់តុលាការខេត្ត ដើម្បីស្នើសុំវិធានការណ៍ដោះស្រាយ លើករណីចោទប្រកាន់មន្ត្រីមេប៉ុស្តិ៍សង្កេតការណ៍០១ថា បានប្រព្រឹត្តអំពើគំរាមកំហែងដល់អាយុជីវិតរបស់ពួកគេ។
លោកស៊ុន ប៊ុនធឿនអធិការស្រុកកែវសីមា ខេត្តមណ្ឌលគីរី បាននិយាយប្រាប់ការសែតភ្នំពេញប៉ុស្តិ៍កាលពីថ្ងៃពុធថា លោកបានកសាងសុំនុំរឿងចោទប្រកាន់លោកមេប៉ុស្តិ៍សង្កេតការណ៍០១ ពាក់ពន្ធ័និងបទគំរាមកំហែងដល់អាយុជីវិតអ្នកកាសែត៣នាក់ កាលពីថ្ងៃទី១៦ ខែឧសភា ដើម្បីជូនទៅស្នងការខេត្ត និងត្រៀមបញ្ជូនទៅតុលាការនៅថ្ងៃពុធនេះ។ លោកបន្តថា ពាក់ពន្ធ័និងករណី នេះ លោកនៅមិនទាន់រកឃើញភស្តុតាង រឺកំណត់មុខសញ្ញាជនល្មើសបាននៅឡើយទេ ដោយសារតែករណីនេះ វាមិនមែនជាបទល្មើសជាក់ស្តែង រឺឯជនរងគ្រោះក៏មិនបានចាំមុខក្រុមឃាតករដែរ ដែលនេះ ជាហេតុធ្វើឲ្យនគរបាលមានផលលំបាកខ្លាំង ក្នុងការស្វែងរកចាប់ខ្លួនជនល្មើស។ លោកថ្លែងថា៖« ដោយសារតែឥឡូវនេះ យើងមិនទាន់អាចប្រមូលភស្តុតាងបានគ្រប់គ្រាន់ ដូច្នេះយើងនៅមិនទាន់អាចបញ្ជាក់បាននៅឡើយទេថា តើអ្នកបញ្ជារពីក្រោយឃាត្តករជាអ្នកណា»?
បើតាមលោកស៊ុន ប៊ុនធឿន ចំពោះវិធានការណ៍ដែលត្រូវអនុវត្តទៅមុខទៀត គឺត្រូវបញ្ជូនសុំនុំរឿងនេះទៅតុលាការជាមុនសិន ដើម្បីអនុវត្តករណីនេះ ទៅតាមការចង្អុលបង្ហាញរបស់តុលាការវិញ។ លោកថា៖«យើងនៅតែបន្តស្វែងរកភស្តុតាងនៅតំបន់កើតហេតុទៀត»។
បើតាមលោកនាង ចន្ថាភ្នាក់ងារស៊ីធីអ៊ិនប្រចាំខេត្តមណ្ឌលគីរីបានប្រាប់ដែរថា មុនថ្ងៃទី១៦ ខែឧសភានេះ លោក និងអ្នកកាសែត២នាក់ទៀត ឈ្មោះលោកសយ គា និងលោកឈីន សំអាន បានចេញផ្សាយអត្ថបទ១ជាប់ពាក់ពន្ធ័និងការគេចពន្ធម៉ូតូខុសច្បាប់ពីប្រទេសវៀតណាមមកលក់ នៅកម្ពុជា ដូច្នេះការផ្សាយរឿងនេះ បានធ្វើឲ្យប៉ះពាល់ដល់លោកមេប៉ុស្តិ៍សង្កេតការណ៍០១ ដោយសារតែមេប៉ុស្តិ៍រូបនេះគឺជាឈ្មួញលក់ម៉ូតូខុសច្បាប់ដែរ។ លោកបញ្ជាក់ថា៖«នៅថ្ងៃទី១៦ ខែឧសភា ខ្ញុំនិងអ្នកកាសែតរងគ្រោះ២នាក់នេះ បានជិះឡានជាមួយគ្នាត្រឡប់មកការិយាល័យរៀងៗខ្លួនវិញ ប៉ុន្តែមកដល់ចំនុចម្តុំគីឡូលេខ១៣៤ស្ថិតនៅភូមិស្នែង ឃុំស្រែខ្ទុម ស្រុកកែវសីហា ស្រាប់តែមានមនុស្សចំនួន៥នាក់មានកាន់ដំបង ខ្លះសៀកពាក់ជាទាហ៊ាន ខ្លះទៀតមានបិទម៉ាស បានសំដៅមកពួកយើងបំរុងនិងធ្វើឃាត្ត ប៉ុន្តែពួកយើងបានបើកឡានរត់គេចខ្លួនបាត់ទៅ»។
លោកសយ គាភ្នាក់ងារកាសែតក្រុងកម្ពុជាបាននិយាយថា លោកនៅតែបារម្ភពីបញ្ហាសុវត្ថិ ភាពរបស់លោក ខណៈដែលសមត្ថកិច្ចនៅតែមិនទាន់ស្វែងរកភស្តុតាង ដើម្បីផ្តន្ទាទោសជនល្មើស បានទៀត។ លោកថ្លែងថា៖«ខ្ញុំមិនដឹងថា ត្រូវដោះស្រាយបញ្ហានេះបែបណាទៀតទេ គឺមានតែរង់ចាំដំណោះស្រាយពីសមត្ថកិច្ចតទៅទៀតប៉ុណ្ណោះ»។
បើតាមលោកវ៉ាន់ ចន្ធារីមេប៉ុស្តិ៍សង្កេតការណ៍០១ នៃវរៈការពារព្រំដែនលេខ១០៣បានឆ្លើយបដិសេធន៍ថា លោកនៅតែប្រកាន់ជំហរដដែលថា លោកមិនដែលគំរាមកំហែងអ្នកណាទេ ហើយបើមានភស្តុតាងគ្រប់គ្រាន់សូមចូលមកដោះស្រាយជាមួយលោកចុះ។
No comments:
Post a Comment