ថ្ងៃទី៣១ ខែ ឧសភា ឆ្នាំ២០១១
បន្ទាយមានជ័យៈ ប្រជាពលរដ្ឋប្រមាណ៣០១គ្រួសារមកពីភូមិចំនួន៤នៃឃុំសំបួរ ស្រុកមង្គលបូរី ខេត្តបន្ទាយមានជ័យបានមកជួបជុំគ្នានៅខាងមុខសាលាខេត្ត កាលពីព្រឹកម្សិលមិញនេះ ដើម្បីតវ៉ាលើរឿងអាជ្ញាធរជលផលបានបោះបង្គោលហ៊ុំពទ្ធ័ដីការពារព្រៃលិចទឹករំលោភចូលដីរបស់ពួកគាត់ដែលមានទំហំច្រើនជាង៧០០ហិតា។
ប្រភពពីតំណាងប្រជាពលរដ្ឋរស់នៅភូមិថ្មដប់ ឃុំសំបួរ ស្រុកមង្គលខេត្តបន្ទាយមានជ័យបាននិយាយប្រាប់ថា ប្រជាពលរដ្ឋប្រមាណ៣០១នាក់ បានរស់នៅក្នុងឃុំសំបួរនេះ ចាប់តាំងពីឆ្នាំ១៩៨២មកម្លេះ។ រហូតមកដល់ឆ្នាំ២០១០នេះ ស្រាប់តែអាជ្ញាធរជលផលបានធ្វើការបោះបង្គោលដីចំនួនពី៤ទៅ៥ដើមចូលរំលោភមកដីស្រែរបស់ប្រជាពលរដ្ឋ ដោយក្រុមអាជ្ញាធរបានអះអាងថា ពួកគេធ្វើបែបនេះ គឺដើម្បីការពារមិនឲ្យមានផលប៉ះពាល់ដល់ព្រៃលិចទឹក។ ប្រភពដដែលបានបន្ត ថា លុះមកដល់ថ្ងៃទី២ ទី៣ ខែមីនា ឆ្នាំ២០១១នេះ ស្រាប់តែមន្ត្រីជលផលរួមទាំងបក្សពួកមួយចំនួនទៀតបាននាំគ្នាសម្រុកបោះបង្គោលជាហូរហែ ដោយរំលោភដីរបស់ពលរដ្ឋចំនួន៧២១,៦៤ហិតា ព្រមទាំងហាមឃាត់មិនឲ្យប្រជាពលរដ្ឋធ្វើស្រែនៅក្នុងតំបន់ទំនាស់ទៀតទេ។
បើតាមតំណាងប្រជាពលរដ្ឋម្នាក់លោកព្រំ សមអាយុ៧៩ឆ្នាំរស់នៅភូមិថ្មដប់ ឃុំសំបួរ ស្រុក មង្គលបូរី បានប្រាប់ភ្នំពេញប៉ុស្តិ៍កាលពីថ្ងៃអង្គារថា នៅក្នុងទំហំដីប្រមាណ៧០០ហិតានេះ បានធ្វើ ឲ្យប៉ះពាល់ដល់ដីប្រជាពលរដ្ឋរស់នៅភូមិស្រណាល ភូមិថ្មដប់ ភូមិដូនឡឹក និងភូមិសំបួរ ដែលសរុបទាំងអស់ចំនួន៣០១គ្រួសារ។ លោកនិយាយថា៖«ខ្ញុំមិនអាចចេញពីដីនេះបានទេ ព្រោះសព្វ ថ្ងៃនេះខ្ញុំនិងប្រជាពលរដ្ឋនៅក្នុងភូមិបានមករស់នៅទីនេះ គឺរំពឹងលើការធ្វើស្រែដើម្បីចិញ្ចឹមជីវិត ដូច្នេះបើអាជ្ញាធរឲ្យពួកយើងចេញមានតែស្លាប់ទើបល្អជាង»។
លោកលុន បូរតំណាងប្រជាពលរដ្ឋម្នាក់ទៀតរស់នៅក្នុងតំបន់កើតហេតុខាងលើបាននិយាយថា កាលពីព្រឹកថ្ងៃអង្គារនេះ ប្រជាពលរដ្ឋប្រមាណជិត៣ពាន់នាក់មកពីភូមិ៤បាននាំគ្នាធ្វើដំណើរ ទៅកាន់សាលាខេត្ត ដើម្បីទាមទារឲ្យមានដំណោះស្រាយជាបន្ទាន់ ប៉ុន្តែមានតែប្រជាពលរដ្ឋ ២០០នាក់ប៉ុណ្ណោះដែលបានមកដល់សាលាខេត្ត រីឯ១០០នាក់ទៀត ត្រូវបានសមត្ថកិច្ចប៉ុស្តិ៍ស្ទាក់ឃាត់តាមផ្លូវមិនឲ្យមកតវ៉ាឡើយ។ លោកបញ្ជាក់ថា៖« ប៉ូលីសប៉ុស្តិ៍បានយាមនៅតាមផ្លូវចាំស្ទាក់សួរអ្នកដំណើរ បើយើងឆ្លើយថាមកពីភូមិរងគ្រោះទាំងបួនខាងលើ គេហាមឃាត់យើងមិនឲ្យធ្វើដំណើរទៅមុខទៀតទេ ដូច្នេះយើងមានតែធ្វើដំណើរតាមផ្លូវកាត់ប៉ុណ្ណោះ»។
លោកអ៊ី ឡុងអភិបាលស្រុកមង្គលបូរី បានថ្លែងឲ្យដឹងថា៖«ខ្ញុំមិនសូវច្បាស់អំពីបញ្ហានេះប៉ុន្មានទេ ប៉ុន្តែដីនៅតំបន់នោះ ភាគច្រើនជាដីរបស់រដ្ឋ ហើយអ្នករុករានថ្មីក៏កើតមានដែរ»។
លោកអ៊ុក កែវរតនៈ អភិបាលរងខេត្តបន្ទាយមានជ័យបានមានប្រសាសន៍ថា លោកបានយកសំណើរនេះទៅគិតពិចារណា និងគ្រោងបញ្ជូនទៅថ្នាក់លើថែមទៀត។គំនិតលោក បើទោះបីជាដីទំនាស់ស្ថិតនៅក្នុងតំបន់ព្រៃលិចទឹកក៏ពិតមែន ប៉ុន្តែទីតាំងនោះគឺជាភូមិចាស់ ហើយប្រជាពលរដ្ឋបានរស់នៅតាំងពីដើមរៀងមកដែរ។ លោកបញ្ជាក់ថា៖«ខ្ញុំនិងស្នើទៅអាជ្ញាធរជលផលឲ្យរំកិលបង្គោលឲ្យផុតពីដីពួកគាត់ ក្នុងករណីបើខ្ញុំពិនិត្យឃើញថា ការបោះបង្គោលនោះពិតជាប៉ះពាល់ដល់ដីពួកគាត់ពិតមែន»។
លោកលី វេប្រធាននាយកដ្ឋានរដ្ឋបាលជលផលមិនបានធ្វើការបំភ្លឺតាមទូរសព្ទ័ទេ ដោយ
លោកឆ្លើយថាជាប់រវល់។
ពាក់ពន្ធ័និងបញ្ហានេះ ប្រជាពលរដ្ឋនៅមិនទាន់ទទួលបានដំណោះស្រាយជាក់លាក់ណាមួយនៅឡើយទេ ដោយពួកគេនៅរង់ចាំការចុះត្រួតពិនិត្យមើលពីស្ថានភាពជាក់ស្តែងពីក្រុមមន្ត្រីអាជ្ញាធរចំរុះក្នុងអំឡុងពេល២ទៅ៣ថ្ងៃខាងមុខនេះ។
